Husband Wife Relation : पती-पत्नीमधील कौटुंबिक वादाने एका कुटुंबावर मोठे संकट कोसळले आहे. पत्नी माहेरी गेल्यानंतर तिला पुन्हा घरी आणण्यासाठी प्रयत्न करणाऱ्या नीरज नावाच्या तरुणाने टोकाचे पाऊल उचले आहे. त्याने घरात स्वत:ला बंद करून गळफास घेतला आहे. मृत तरूण हा भाजप नेते सहदेव यांचा मुलगा असल्याचे सांगितले जात आहे. या घटनेनंतर हळहळ व्यक्त केली जातेय. गळफास घेण्याआधी नीरजने आपल्या पत्नीशी संवाद साधला होता. आतापर्यंत मी तुला एक चापटही मारलेली नाही, तरीही तू परत यायला तयार नाहीस, अशी खंत त्याने आपल्या पत्नीसमोर बोलून दाखवली होती, असा दावा नीरजच्या कुटुंबाने केलाय.
नेमकं काय घडलं?
मिळालेल्या माहितीनुसार, ही घटना उत्तर प्रदेशातील आहे. उत्तर प्रदेशातील बागपत कोतवाली परिसरातील देशराज या भागात नीरज आपल्या कुटुंबासह राहत होता. सुमारे तीन वर्षांपूर्वी त्याचा गौरीपूर गावातील तरुणीशी विवाह झाला होता. लग्नानंतर काही काळाने दोघांमध्ये मतभेद निर्माण झाले. पुढे त्यांचे सतत वाद होऊ लागले.
तिची समजूत काढण्याचा प्रयत्न केला पण…
नीरजची पत्नी गर्भवती असून ती काही काळापासून माहेरी राहत होती. पत्नीने पुन्हा सासरी यावे, अशी नीरजची इच्छा होती. त्यासाठी तो तिची समजूत काढण्याचा प्रयत्न करत होता. दोन दिवसांपूर्वीही याच मुद्द्यावरून दोन्ही कुटुंबांमध्ये वाद झाला होता. प्रकरण पोलिसांपर्यंत पोहोचल्यानंतर नीरजला पोलीस ठाण्यात नेण्यात आले होते. तशी माहिती नीरजच्या कुटुंबीयांनी दिली.
… तरीदेखील तू परत येत नाहीस
पोलीस ठाण्यात जावे लागले असले तरीही नीरजने पत्नीशी फोनवरून संवाद साधत नाते टिकवण्याचा प्रयत्न केला. मात्र पत्नीने परत येण्यास नकार दिल्याने तो मानसिकदृष्ट्या खचला होता. गळफास घेण्याआधीही नीरज त्याच्या पत्नीशी बोलला होता. तो परत ये, अशी विनवणी करत होता. मी आतापर्यंत कधीच तुला मारले नाही. एकदाही कानाखाली मारलेली नाही, तरीदेखील तू परत येत नाहीस, अशी खदखद त्याने आपल्या पत्नीला बोलून दाखवली होती, असा दावा नीरजच्या कुटुंबीयांनी केला आहे. दरम्यान, या घटनेनंतर पोलिसांनी घटनास्थळी धाव घेत पंचनामा केला आहे. पोलीस या प्रकरणाचा तपास करत आहेत. सखोल तपास करून पुढील प्रक्रिया केली जाईल, असे पोलिसांनी सांगितले आहे.
Leave a Reply