भोंदू लिंगपिसाट खरातचं प्रकरण उघडं झाल्यानंतर त्याच्यावर कारवाई करण्यात आली. त्याला तुरुंगात टाकण्यात आलं. त्यानिमित्ताने भोंदूगिरीवर बरंच लिहिलं गेलं. बोललं गेलं. असंख्य बातम्या झाल्या. पण लोक या भोंदूगिरीतून काही बाहेर पडताना दिसत नाहीये. आजही लोक भोंदूबाबांच्या नादी लागताना दिसत आहेत. नागपूरमध्ये एक महिला भोंदूबाबाच्या नांदी लागली आणि आयुष्यभराची कमाई गमावून बसली. या सनसनाटी घटनेने नागपूरकर हादरून गेले आहेत. त्यामुळे पुन्हा एकदा भोंदूगिरी आणि त्यांच्या नादी लागणाऱ्या अंधश्रद्धाळूंचा प्रश्न ऐरणीवर आला आहे.
नागपुरात देवीच्या कोपाची भीती दाखवत भोंदू ज्योतिषांनी एका ज्येष्ठ महिलेची फसवणूक केली. या महिलेचे सुमारे पाच तोळे सोन्याचे दागिने आणि मोबाईल असा मुद्देमाल लंपास केल्याची धक्कादायक घटना उघडकीस आली आहे. ही सगळी घटना सीसीटीव्ही कॅमेऱ्यात कैद झाली आहे. त्यामुळे एकच खळबळ उडाली असून भोंदू ज्योतिषावर कठोर कारवाई करण्याची मागणी होत आहे.
रुग्णालयातून बाहेर पडल्या अन्…
नागपूरच्या इमामवाडापोलीस ठाण्याच्या हद्दीतील मेडिकल चौकाजवळ, व्हीआर मॉल शेजारी रामबागकडे जाणाऱ्या रस्त्यावर ही घटना घडली. सुजाता भगवानलाल अगरवाल या रुग्णालयातून मुलीच्या घरी जात असताना स्वतःला ज्योतिष असल्याचे सांगणाऱ्या दोन भामट्यांनी त्यांना गाठले. तुमच्यावर देवीचा कोप झाला असून त्यामुळेच तुमची आई आजारपणामुळे अंथरुणाला खिळली आहे, अशी भीती त्यांनी सुजाता यांना दाखवली. तसेच हा प्रकोप दूर करायचा असेल तर हातातील सोन्याच्या बांगड्या आणि गळ्यातील सोनसाखळी पिशवीत ठेवण्यास सांगितले.
50 पावलं मागे चला, पण…
आईच्या आजारपणाची माहिती कशी मिळाली? असा प्रश्न सुजाता अगरवाल यांच्या मनात आला. या ज्योतिषांकडे दैवी शक्ती असल्याचं त्यांना वाटलं. त्यामुळे सुजाता अगरवाल यांचा त्यांच्यावर विश्वास बसला. सुजाता यांनी सुमारे चार तोळ्यांच्या सोन्याच्या बांगड्या आणि गळ्यातील सोनसाखळी, मोबाइल काढून पिशवीत ठेवली. यानंतर आरोपींनी त्यांना डोळे बंद करून 50 पावले मागे चालत जाण्यास सांगितले आणि मागे वळून पाहू नका, अशी ताकीद दिली. याच दरम्यान आरोपींनी पिशवीची अदलाबदल करून सोन्याचे दागिने घेऊन घटनास्थळावरून पलायन केले. या प्रकरणी इमामवाडा पोलिसांनी गुन्हा दाखल करून पुढील तपास सुरू केला आहे.
Leave a Reply