पुण्यामध्ये दहीहंडी उत्सवादरम्यान ध्वनी प्रदूषण केल्याप्रकरणी एका मंडळावर गुन्हा दाखल करण्यात आला आहे. बिबवेवाडी परिसरातील श्रीकृष्ण तरुण मंडळावर ही कारवाई करण्यात आली असून, पोलिसांनी त्यांची साऊंड सिस्टिम देखील जप्त केली आहे. ही घटना पुण्यातील दहीहंडी उत्सवामध्ये ध्वनी प्रदूषणासंदर्भात दाखल झालेला पहिला गुन्हा ठरली आहे. मिळालेल्या माहितीनुसार, लाऊड स्पीकरसाठी चार बेस आणि चार टॉप स्पीकर वापरण्याचीच परवानगी आहे.
मात्र, श्रीकृष्ण तरुण मंडळाने आठ बेस आणि आठ टॉप स्पीकर वापरले होते, जे निर्धारित मर्यादेपेक्षा अधिक होते. यामुळे ध्वनी प्रदूषणाचे नियम मोडले गेले. पोलिसांनी तात्काळ कारवाई करत या मंडळाचे अध्यक्ष राहुल जगताप यांच्यावर गुन्हा दाखल केला आहे. या कारवाईमुळे उत्सवादरम्यान ध्वनी प्रदूषणाबाबत प्रशासन गंभीर असल्याचे स्पष्ट झाले आहे. ध्वनी प्रदूषणाचे नियम मोडल्याबद्दल संबंधित मंडळावर भारतीय दंड संहिता आणि पर्यावरण संरक्षण कायद्यांतर्गत कारवाई करण्यात आली आहे. अशा घटना टाळण्यासाठी सर्व मंडळांनी परवानगीचे नियम पाळावेत, असे आवाहन प्रशासनाने केले आहे.
Leave a Reply