पाकिस्तान मोठ्या संकटात, 15 ऑगस्टपासून पेट्रोल पंप बंद होणार; अवघ्या 72 तासांचा अल्टिमेटम

पाकिस्तानात पेट्रोल पंप चालवणारे डिलर आणि सरकारच्या दरम्यान वाद वाढला आहे. पाकिस्तान पेट्रोलियम डीलर्स असोसिएनने सरकारला आपल्या मागण्या पूर्ण करण्यासाठी अवघ्या 72 तासांचा अल्टिमेटम दिला आहे. आमच्या मागण्या मान्य नाही झाल्या तर 15 ऑगस्टच्या पहाटे 6 वाजल्यापासून संपूर्ण पाकिस्तानात अनिश्चित काळासाठी पेट्रोल पंप बंद ठेवण्यात येणार असल्याचा इशारा या डीलरांनी दिला आहे. मागण्या पूर्ण होईपर्यंत पेट्रोल पंप उघडण्यात येणार नाही, असा इशाराच या डिलरांनी दिला आहे. त्यामुळे पाकिस्तानात 15 ऑगस्टपासून इंधन संकट घोंघावण्याची शक्यता वाढली आहे.

पीपीडीएचे चेअरमन मलिक खुदा बख्श यांनी पत्रकार परिषद घेऊन हा इशारा दिला आहे. सध्याच्या परिस्थितीत व्यवसाय चालवणं कठिण झालं आहे. देशभरातील डिलरांसोबत झालेल्या बैठकीनंतर असोसिएशनने पेट्रोलच्या किरकोळ विक्रीतील आपली मार्जिन 8 टक्क्याने वाढवून देण्याची मागणी केली, असं मलिक खुदा बख्श यांनी सांगितलं. ही मागणी पूर्ण करण्यासाठी असोसिएशनच्या 14 हजार सदस्यांनी कारवाईसाठी दबाव वाढवल्याची माहितीही त्यांनी दिली.

आश्वासन देऊनही पूर्ण नाही

या आधी सरकारने दोन आठवड्यात डिलरांच्या समस्यांवर मार्ग काढण्याचं आश्वासन दिलं होतं. पीपीडीएचे चेअरमनने 7 ऑगस्ट रोजी पेट्रोलियम मंत्री अली परवेज मलिक यांना डिलरांच्या समस्यांची माहिती दिली होती. यापूर्वीही डिलर देशभरात संप पुकारणार होते. पण त्यावेळी पेट्रोलियम मंत्र्यांनी त्यांना संप टाळण्यास सांगितलं. तसेच दोन आठवड्याच्या आत तुमचा प्रश्न मार्गी लावू असं आश्वासन दिलं होतं, अशी माहितीही त्यांनी दिली. मात्र, डीलरांच्या म्हणण्यानुसार, मंत्र्याने आश्वासन देऊनही समस्या सुटलेल्या नाहीत. त्यामुळेच सरकारला 72 तासांचा अल्टिमेटम दिला आहे.

रोज भाव बदलतात

डीलरांची सर्वात मोठी तक्रार ही पाकिस्तानच्या डेली प्राइस मॅकेनिज्म व्यवस्थेबाबतची आहे. या व्यवस्थेत पेट्रोलच्या किंमतीत वारंवार बदल होतात. पीपीडीएच्या म्हणण्यानुसार, या पेट्रोल पंप मालकांना आपल्या जुन्या स्टॉकवर नुकसान सोसावं लागतं. डीलरांच्या मते, यामुळे व्यवसाय चालवण्यासाठी पैसा कमी पडू लागला आहे. दुसरीकडे महागाई वाढल्याने पेट्रोल पंप चालवण्याचा खर्चही वाढला आहे. वीज आणि गॅसचे बिल, कर्मचाऱ्यांचे वेतन आणि इतर खर्चांचा बोझा वााढला आहे. सध्या जे कमिशन मिळत आहे, त्यातून हा खर्च भागवणं कठिण झालं आहे.

आता 72 तासात पाकिस्तान सरकारला निर्णय घ्यावा लागणार आहे. जर सरकार आणि डिलरांमध्ये तडजोड नाही झाली तर 15 ऑगस्टच्या पहाटे 6 वाजल्यापासून पेट्रोल पंप चालक अनिश्चितकालीन संपावर जाणार आहेत. त्यामुळे पाकिस्तानात पेट्रोल- डिझेलचा पुरवठा, लोकांची ये-जा आणि दैनंदिन व्यवहारांवर त्याचा परिणाम होण्याची भीती निर्माण झाली आहे. त्यामुळे पाकिस्तानी नागरिकांना नव्या संकटाला सामोरे जावं लागणार आहे.

Source link