नवी मुंबईतील एल. पी. पुलाखालील बिकानेरसमोर शॉर्टसर्किट झाल्याची धक्कादायक घटना घडली असून, या घटनेत दोन विद्यार्थिनी विजेच्या प्रवाहाच्या संपर्कात आल्या. पावसाचे पाणी साचलेल्या परिसरातून जात असताना विद्युत प्रवाह पसरल्याने दोघींनाही विजेचा धक्का बसला आणि त्या पाण्यात कोसळल्या.
घटनेनंतर स्थानिक नागरिकांनी आणि उपस्थितांनी तातडीने दोन्ही विद्यार्थिनींना बाहेर काढत उपचारासाठी जवळच्या रुग्णालयात दाखल केले. सध्या त्यांच्यावर वैद्यकीय उपचार सुरू असून त्यांच्या प्रकृतीवर डॉक्टरांकडून लक्ष ठेवण्यात येत आहे.
घटनेची माहिती मिळताच महापौर सुजाता पाटील यांनी घटनास्थळी भेट देत परिस्थितीची पाहणी केली. तसेच संबंधित यंत्रणांना आवश्यक त्या उपाययोजना करण्याच्या सूचना देण्यात आल्याची माहिती समोर आली आहे.
या घटनेनंतर परिसरातील विद्युत सुरक्षिततेबाबत गंभीर प्रश्न उपस्थित झाले असून, शॉर्टसर्किट नेमके कशामुळे झाले याचा तपास संबंधित यंत्रणांकडून सुरू आहे.
Leave a Reply