नीट पेपरफुटीप्रकरणी केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी दिल्लीत कॉक्रोच जनता पार्टीच्या नेतृत्वाखाली विद्यार्थ्यांचं आंदोलन सुरू आहे. या आंदोलनाची धग आता मुंबईतही पोहोचली आहे. मुंबईतील दादर परिसरात असंख्य तरुण-तरुणांनी, विद्यार्थ्यांनी सीजेपीच्या समर्थनार्थ आंदोलन केलं. मात्र याच आंदोलनात एका सिव्हिल ड्रेसमधील पोलिसाकडून एका आंदोलक महिलेसोबत गैरवर्तन झाल्याचा प्रकार समोर आला आहे. सोशल मीडियावर या घटनेचा व्हिडीओ तुफान व्हायरल होत असून आता राजकीय नेत्यांनीही त्यावरून तीव्र संताप व्यक्त केला आहे. या व्हिडीओमध्ये सिव्हिल ड्रेसमधील एक पोलीस अधिकारी तावातावाने आंदोलकांसमोर येतो आणि एका महिलेला चुकीच्या पद्धतीने स्पर्श करताना दिसत आहे.
राष्ट्रवादीचे आमदार रोहित पवार यांनी सोशल मीडियावर हा व्हिडीओ पोस्ट करत कारवाईची मागणी केली आहे. ‘हा व्हिडिओ बघून डोक्याची तिडीक उठली. कोण आहे नराधम? याच्या मुलीच्या वयाच्या मुलीसोबत हा किती किळसवाणं कृत्य करतोय. हा पोलीस असेल तर पहिलं याला निलंबित नाही तर पोलीस दलातून बडतर्फ करा आणि विनयभंगाचा गुन्हा दाखल करून गजाआड करा. एक वेगळी प्रतिष्ठा असलेल्या महाराष्ट्र पोलीस दलाला लागलेली ही कीड आहे,’ असं त्यांनी लिहिलं आहे.
हा व्हिडिओ बघून डोक्याची तिडीक उठली. कोण आहे नराधम?
याच्या मुलीच्या वयाच्या मुलीसोबत हा किती किळसवाण कृत्य करतोय. हा पोलीस असेल तर पहिले याला निलंबित नाही तर पोलीस दलातून बडतर्फ करा.. आणि विनयभंगाचा गुन्हा दाखल करून गजाआड करा.
एक वेगळी प्रतिष्ठा असलेल्या महाराष्ट्र पोलीस दलाला… pic.twitter.com/LsvEhwALzT— Rohit Pawar (@RRPSpeaks) July 23, 2026
‘देवेंद्र फडणीस माफी मागा. स्वतःला देवाभाऊ म्हणवून घेणारा, तर दुर्योधन निघाला. दुर्योधनाने सत्तेच्या अहंकारात द्रौपदीचं वस्त्रहरण केलं होतं. देवाभाऊंचे पोलीस इतके मस्तवाल झाले आहेत की ते आपल्या मुलीच्या वयाच्या विद्यार्थीनींचा विनयभंग करत आहेत. आमच्या लेकींच्या अब्रूवर हात टाकणाऱ्या या नराधमांना तात्काळ पोलीस दलातून बडतर्फ करून गजाआड केलं पाहिजे,’ असं काँग्रेस प्रदेशाध्यक्ष हर्षवर्धन सपकाळ यांनी म्हटलंय. पोलिसाचा हा व्हिडीओ काँग्रेसच्या अध्यक्षा वर्षा गायकवाड, जितेंद्र आव्हाड यांच्याकडूनही एक्स (ट्विटर) अकाऊंटवर पोस्ट करण्यात आला आहे.
रोहित पवार यांनी राजकीय फायद्यासाठी सोशल मीडियावरील एका व्हिडिओचा विपर्यास करून मुंबई पोलिसांची बदनामी करण्याचा प्रयत्न केला आहे. वस्तुस्थिती अशी दिसते की, संबंधित पोलीस अधिकारी कोणत्याही महिलेशी गैरवर्तन करतांना दिसत नाहीत. ते निळ्या शर्टमधील व्यक्तीला पकडण्यासाठी धावत गेले… https://t.co/CQwfr9tJML pic.twitter.com/2hdBKVAOEY
— Navnath Kamal Uttamrao Ban (@NavnathBanBJP) July 24, 2026
दुसरीकडे रोहित पवार यांनी राजकीय फायद्यासाठी सोशल मीडियावरील एका व्हिडिओचा विपर्यास करून मुंबई पोलिसांची बदनामी करण्याचा प्रयत्न केला आहे, असा आरोप भाजपच्या नवनाथ बन यांनी केला आहे. ‘वस्तुस्थिती अशी दिसते की, संबंधित पोलीस अधिकारी कोणत्याही महिलेशी गैरवर्तन करतांना दिसत नाहीत. ते निळ्या शर्टमधील व्यक्तीला पकडण्यासाठी धावत गेले होते. हे व्हिडिओच्या सुरूवातीपासून स्पष्ट दिसत आहे. रोहितदादा, तुमच्या राजकीय फायद्यासाठी आणि स्वार्थी राजकारणासाठी मुंबई पोलीसांना बदनाम करू नका. फक्त सनसनाटी निर्माण करण्यापेक्षा तथ्यांची पडताळणी करूनच सार्वजनिक आरोप करायला हवेत. तुमचं हे राजकारण बघून जनतेच्या डोक्यात तिडीक येते हे लक्षात ठेवा. मुंबई पोलिसांची प्रतिमा मलीन करण्याचं राजकारण थांबवा आणि व्हिडिओ पुन्हा एकदा नीट डोळे उघडून बघा,’ असं त्यांनी पुढे म्हटलंय. या आरोप-प्रत्यारोपांनंतर संबंधित पोलीस अधिकाऱ्याची चौकशी करण्यात येत असल्याचं कळतंय. या चौकशीअंती नेमकं काय समोर येईल आणि संबंधित अधिकाऱ्यावर कारवाई होईल का, हे पाहणं महत्त्वाचं ठरणार आहे.
Leave a Reply