९० च्या दशकातील प्रसिद्ध अभिनेत्री ममता कुलकर्णी एकेकाळी बॉलिवूडमधील सर्वात सुंदर आणि बोल्ड अभिनेत्रींपैकी एक मानली जात असे. मात्र, २०२५ मध्ये दिलेल्या एका मुलाखतीनंतर ती पुन्हा एकदा चर्चेत आली आहे. या मुलाखतीत तिने अंडरवर्ल्ड डॉन दाऊद इब्राहिमशी असलेला कोणताही संबंध नाकारला आणि इतकेच नाही तर तो कोणी दहशतवादी नाही’ असेही विधान केले. तिच्या या वक्तव्याने सर्वांनाच आश्चर्याचा धक्का बसला. याच वर्षी ती भारतात परतली आणि अनेक वर्षांनंतर पहिल्यांदाच सार्वजनिक ठिकाणी दिसली.
लोक आता पुन्हा एकदा जाणून घेऊ इच्छितात की, ममता कुलकर्णी नेमकी भारत सोडून का गेली होती? ममताचा जन्म एका प्रतिष्ठित कुटुंबात झाला होता. तिचे वडील ट्रान्सपोर्ट कमिशनर होते. १९९२ मध्ये तिने चित्रपटसृष्टीत पाऊल ठेवले आणि अल्पावधीतच स्वतःची ओळख निर्माण केली. तिने ‘करण अर्जुन’, ‘सबसे बडा खिलाडी’ आणि ‘बाजी’ यांसारख्या अनेक मोठ्या चित्रपटांत काम केले. या चित्रपटांमध्ये तिने सलमान खान, शाहरुख खान आणि अक्षय कुमार यांसारख्या सुपरस्टार्ससोबत स्क्रीन शेअर केली. तिचे सौंदर्य आणि बोल्ड अंदाज तिला इतर अभिनेत्रींपासून वेगळे ठरवत असे.
चित्रपटसृष्टीतील बेधडक अभिनेत्री
ममता केवळ तिच्या चित्रपटांसाठीच नाही, तर तिच्या बिंदास स्वभावासाठीही ओळखली जात असे. तिने फिल्मफेअरचा ‘न्यू फेस अवॉर्ड’ही जिंकला होता. एकेकाळी तिने एका मॅगझिनसाठी टॉपलेस फोटोशूट केले होते, ज्यामुळे संपूर्ण इंडस्ट्रीत खळबळ उडाली होती. असे म्हटले जाते की, ती कोणालाही घाबरत नसे आणि जर एखाद्या दिग्दर्शकाने किंवा निर्मात्याने तिला नियंत्रित करण्याचा प्रयत्न केला, तर ती उघडपणे त्याला विरोध करायची. तिचा हाच बेधडक स्वभाव तिला खास बनवत होता, पण हळूहळू हीच गोष्ट तिच्या करिअरवर बेतली आणि तिला काम मिळणे कमी झाले.
इंडस्ट्रीतील संबंध बिघडले
काळासोबत ममताचे इंडस्ट्रीतील लोकांशी असलेले संबंध बिघडू लागले. अनेकांशी तिचे वाद झाले आणि याचा परिणाम तिच्या करिअरवर स्पष्टपणे दिसू लागला. हळूहळू चित्रपटांच्या ऑफर्स येणे बंद झाले आणि तिने स्वतःच इंडस्ट्रीपासून लांब राहणे पसंत केले. त्यानंतर ती भारत सोडून परदेशात स्थायिक झाली. तिने दुबई, दक्षिण आफ्रिका आणि त्यानंतर केनियामध्ये बराच काळ व्यतीत केला. प्रदीर्घ काळ ती प्रसिद्धीझोतातून पूर्णपणे लांब होती आणि तिचे आयुष्य एक रहस्य बनले होते. २०१५ मध्ये ममताचे नाव एका मोठ्या ड्रग्ज प्रकरणात समोर आले आणि सर्वांनाच धक्का बसला.
ड्रग्ज तस्करी प्रकरणात नाव आले
पोलिसांच्या माहितीनुसार, हे सुमारे २००० कोटी रुपयांचे आंतरराष्ट्रीय ड्रग्ज रॅकेट होते. ‘मेथामफेटामाइन’ तयार करण्यासाठी ‘एपेड्रिन’चा पुरवठा या रॅकेटद्वारे केला जात असल्याचा आरोप होता. त्यावेळी हे भारतातील सर्वात मोठे ड्रग्ज प्रकरण असल्याचे सांगितले गेले. या केसमध्ये ममतालाही आरोपी करण्यात आले आणि ती या नेटवर्कचा भाग असल्याचा दावा केला गेला. मात्र, ममताने सुरुवातीपासूनच हे आरोप फेटाळून लावले होते. या प्रकरणात तिचा पार्टनर विक्की गोस्वामी याचेही नाव आले, ज्याला या संपूर्ण रॅकेटचा मास्टरमाईंड म्हटले गेले. त्याचे संबंध दाऊद इब्राहिमच्या ‘डी-कंपनी’शी असल्याचेही बोलले गेले.
२०२४ मध्ये सर्व आरोपातून मुक्तता
पोलिसांनी असा दावा केला होता की, २०१६ मध्ये नैरोबीमध्ये झालेल्या एका बैठकीत ममता सहभागी झाली होती, जिथे या रॅकेटचे नियोजन झाले होते. पण ममताने या सर्व गोष्टी खोट्या असल्याचे सांगितले. अखेर २०२४ मध्ये मुंबई उच्च न्यायालयाने तिच्याविरोधातील सर्व आरोप फेटाळून लावले आणि ही केस ‘पूर्णपणे निराधार’ असल्याचे स्पष्ट केले. २०२५ मध्ये दिलेल्या मुलाखतीत ममताने पुन्हा एकदा स्पष्ट केले की, तिचा दाऊद इब्राहिमशी काहीही संबंध नाही. ती म्हणाली, ‘माझा दाऊद इब्राहिमशी कोणताही संबंध नव्हता. ज्या व्यक्तीचे नाव घेतले गेले, त्याने देशात कोणताही बॉम्बस्फोट किंवा देशविरोधी कृत्य केलेले नाही.’
Leave a Reply