पुणे जिल्ह्यातील शिरूर तालुक्यातील मांडवगण फराटा येथील एका खासगी रुग्णालयात हृदयद्रावक प्रसंग घडला. ज्याचा सीसीटीव्ही व्हिडीओ तूफान व्हायरल होत आहे. हा व्हिडीओ पाहून अंगावर काटा येतोय. 60 वर्षीय रमेश जयसिंग मोरे हे तपासणीसाठी रुग्णालयात आले होते. अचानक रुग्णालयाच्या प्रवेशद्वारातच ते कोसळले. डॉ. अतुल सुराणा यांनी तात्काळ धाव घेत तपासणी केली. यादरम्यान त्यांच्या लक्षात आले की, रुग्णाचे हृदय बंद पडले आहे. त्यानंतर त्यांनी सुमारे 10 मिनिटे सातत्याने सीपीआर (CPR) देत रुग्णाचे बंद पडलेले हृदय पुन्हा सुरू करण्यात यश मिळवले. डॉक्टरांच्या प्रसंगावधानामुळे आणि तातडीच्या उपचारांमुळे रमेश मोरे यांचे प्राण वाचले असून या घटनेची परिसरात मोठी चर्चा होत आहे. ही पूर्ण घटना सीसीटीव्हीमध्ये दिसत आहे.
रमेश जयसिंग मोरे तपासणीसाठी रुग्णालयात आले होते. यावेळी ते टेबलजवळ पोहोचले असता ते अचानक जमिनीवर कोसळत होते. तिथे उपस्थित महिलेने त्यांनी पडताना पाहिले आणि पकडले. त्यानंतर अजून काहीजण पुढे आले आणि त्यांनी जमिनीवर कोसळण्यापासून मोरे यांना वाचवले. लोकांचा गोंधळ ऐकून डॉ. सुराणा तात्काळ बाहेर आले.
त्यांच्या लक्षात आले की, मोरे यांचे हृदय बंद पडले. डॉक्टरांनी कोणताही विचार न करता तात्काळ आहे त्याच जागेवर सीपीआर मोरे यांना दिले. तब्बल दहा मिनिटे ते सीपीआर देत होते. यावेळी उपस्थित लोकांनीही मदत केली. दहा मिनिटांच्या सीपीआरने मोरे यांचे हृदय पुन्हा सुरू झाले. काळ आला होता पण वेळ चांगली होती, असे म्हटले जात आहे.
डॉक्टरांच्या प्रसंगावधानाने 60 वर्षीय रुग्णाला जीवदान; 10 मिनिटांच्या CPR ने बंद पडलेले हृदय पुन्हा सुरू pic.twitter.com/SN1m0SN1fh
— TV9 Marathi (@TV9Marathi) July 25, 2026
डॉक्टरांनी मोरे यांना वाचवण्यासाठी किती जास्त प्रयत्न केले, हे या व्हिडीओवरून स्पष्ट होतंय. सर्वत्र डॉक्टर सुराणा यांचे काैतुक केले जातंय. दारातच कोसळलेल्या रुग्णावर डॉक्टरांनी तातडीने उपचार केले आणि त्याला नवे जीनवदान दिले. डॉक्टरांनी केलेल्या सीपीआरनंतर मोरे उभे राहताना देखील दिसत आहेत. आता तोच व्हिडीओ सोशल मीडियावर चांगला व्हायरल झाला आहे.
Leave a Reply