बॉलिवूड अभिनेता इमरान हाशमीच्या कारकिर्दीत त्याच्या चित्रपटांइतकीच त्याच्या गाण्यांनीही लोकप्रियता मिळवली आहे. रोमँटिक आणि भावनिक गाण्यांमुळे इमरान हाशमीची वेगळी ओळख निर्माण झाली. त्यापैकी 'मर्डर' चित्रपटातील 'कहो ना कहो' हे गाणे आजही चाहत्यांच्या आवडत्या प्लेलिस्टमध्ये कायम आहे.
मात्र, या गाण्याबाबत एक रंजक माहिती समोर आली आहे. अनेकांच्या मते, या गाण्याची धून एका परदेशी गाण्यापासून प्रेरित असल्याची चर्चा आहे. या धूनची सुरुवात 2000 साली इजिप्तमधील प्रसिद्ध पॉप गायक अमर दियाब यांच्या 'Tamally Maak' या गाण्यापासून झाली होती.
हे गाणे मध्यपूर्वेसह अनेक देशांमध्ये प्रचंड लोकप्रिय ठरले. त्यानंतर याच धूनवर आधारित किंवा त्यासारख्या चालीची विविध गाणी अनेक देशांत प्रदर्शित झाली. 'मर्डर' चित्रपटातील 'कहो ना कहो' हे गाणे गायक आमिर जमाल यांनी गायले होते.
या गाण्याला संगीतकार अनु मलिक यांनी संगीत दिले तर गीतकार सईद कादरी यांनी शब्द लिहिले होते. इमरान हाशमी आणि मल्लिका शेरावत यांच्यावर चित्रित झालेल्या या रोमँटिक गाण्याने प्रदर्शित होताच मोठी लोकप्रियता मिळवली. या गाण्यामुळे इमरान हाशमीची 'रोमँटिक हिरो' म्हणून ओळख आणखी मजबूत झाली.
या गाण्याच्या आंतरराष्ट्रीय धूनशी असलेल्या साम्याची चर्चा समोर आल्यानंतर सोशल मीडियावर नव्याने वाद सुरू झाला आहे. काही जण 'कहो ना कहो'ला थेट परदेशी गाण्याची कॉपी म्हणत आहेत तर काहींच्या मते हे गाणे मूळ धूनपासून प्रेरित आहे.
Leave a Reply