वास्तुशास्त्र आणि ज्योतिषशास्त्रानुसार स्वयंपाकघरातील काही महत्त्वाच्या वस्तूंचा संबंध विविध ग्रहांशी जोडला जातो. त्यामुळे पीठ, हळद, मीठ, तांदूळ आणि मोहरीचे तेल या वस्तूंचे डबे पूर्णपणे रिकामे होणे शुभ मानले जात नाही. अशा वेळी घरात आर्थिक अडचणी, नकारात्मक ऊर्जा आणि कामांमध्ये अडथळे निर्माण होण्याची शक्यता असल्याची धारणा आहे.
वास्तुनुसार पीठ हे घरातील मान-सन्मान आणि आर्थिक स्थैर्याचे प्रतीक मानले जाते. पीठाचा डबा पूर्ण रिकामा होण्यापूर्वीच तो भरून ठेवावा. हळदीचा संबंध गुरु ग्रहाशी जोडला जात असल्याने ती संपल्यास शुभ कार्यांत अडथळे येतात अशी मान्यता आहे.
मीठ हे नकारात्मक ऊर्जा दूर करण्याचे प्रतीक मानले जाते. त्यामुळे मीठ संपण्यापूर्वी नवीन मीठ घरात आणावे असा सल्ला दिला जातो. याशिवाय तांदूळ हे माता लक्ष्मी आणि ऐश्वर्याचे प्रतीक मानले जातात. तांदळाचे भांडे कधीही पूर्ण रिकामे ठेवू नये असे वास्तुशास्त्र सांगते.
मोहरीचे तेल हे शनी ग्रहाशी संबंधित मानले जाते. स्वयंपाक करताना तेल अचानक संपणे अशुभ मानले जाते. विशेषतः शनिवारी घरात पुरेसे मोहरीचे तेल असावे अशीही श्रद्धा आहे.
तसेच स्वयंपाकघर नेहमी स्वच्छ ठेवणे, रात्री खरकटी भांडी न ठेवणे आणि या पाचही वस्तू वेळेवर भरून ठेवणे हे समृद्धी आणि सकारात्मक वातावरणासाठी लाभदायक मानले जाते. मात्र, या सर्व गोष्टी धार्मिक आणि वास्तुशास्त्रीय श्रद्धांवर आधारित असून त्यांना वैज्ञानिक पुष्टी उपलब्ध नाही.
Leave a Reply