टीव्ही विश्वातून आणखी एका सेलिब्रिटी जोडप्याच्या नात्यात दुरावा आल्याची बातमी समोर आली आहे. 'नामकरण', 'शहजादी… है तू दिल की' आणि सध्या 'सैराब' या मालिकांमधून प्रेक्षकांच्या भेटीला येणारी अभिनेत्री प्रकृती नौटियाल हिने लग्नाच्या अवघ्या दोन वर्षांत पती वंदित शाह यांच्यापासून विभक्त होण्याचा निर्णय घेतला आहे.
दोघांनीही परस्पर संमतीने घटस्फोटासाठी न्यायालयात अर्ज दाखल केला असून, या प्रकरणाची पुढील सुनावणी नोव्हेंबरमध्ये होणार असल्याची माहिती समोर आली आहे. माध्यमांतील वृत्तानुसार, प्रकृती आणि वंदित यांनी जवळपास सहा महिने एकमेकांना डेट केल्यानंतर 14 फेब्रुवारी 2024 रोजी विवाह केला होता.
प्रेमविवाह करून नव्या आयुष्याची सुरुवात केलेल्या या जोडप्याच्या नात्यात मात्र लग्नानंतर काही काळातच मतभेद निर्माण झाले. सूत्रांनी दिलेल्या माहितीनुसार, सुरुवातीला सर्व काही सुरळीत असले तरी कालांतराने दोघांमध्ये वारंवार वाद होऊ लागले.
स्वभावातील मतभेद आणि नात्यातील वाढता तणाव यामुळे आपण एकमेकांसाठी योग्य जोडीदार नसल्याची जाणीव दोघांनाही झाली. अखेर नातं टिकवण्यापेक्षा परस्पर संमतीने वेगळं होणंच योग्य ठरेल असा निर्णय त्यांनी घेतला.
वृत्तानुसार, प्रकृतीने लग्नानंतर काही महिन्यांतच, म्हणजे ऑगस्ट 2024 मध्ये सासरचं घर सोडलं होतं. तेव्हापासून ती पतीपासून वेगळी राहत असून, आता दोघांनीही कायदेशीररित्या वैवाहिक नातं संपवण्याचा निर्णय घेतला आहे. मात्र, या वृत्तावर प्रकृती नौटियाल किंवा वंदित शाह यांनी अद्याप कोणतीही अधिकृत प्रतिक्रिया दिलेली नाही.
Leave a Reply