अमेरिका आणि इराण यांच्यातील युद्ध अद्याप पूर्णपणे थांबलेले नाही. अलीकडेच होर्मुज सामुद्रधुनी पार करण्याचा प्रयत्न करणाऱ्या दोन भारतीय जहाजांवर इराणने हल्ला केल्याची बातमी समोर आली होती. या घटनेवर भारत सरकारने नाराजी व्यक्त करत इराणी राजदुताकडे उत्तर मागितले होत. अशातच आता याबाबत एका पत्रकाराने अमेरिकेचे राष्ट्राध्यक्ष डोनाल्ड ट्रम्प यांना प्रश्न विचारण्याचा प्रयत्न केला होता, मात्र प्रश्न विचारताच ते संतप्त झाले आणि त्यांनी त्या पत्रकाराला बाहेर जाण्यास सांगितले असल्याची माहिती समोर आली आहे. CBS News च्या पत्रकाराने याबाबतचा व्हिडिओ सोशल मीडियावर शेअर केला असून, यानंतर ट्रम्प यांच्या वर्तनावर अनेकांनी प्रश्न उपस्थित केले आहेत.
डोनाल्ड ट्रम्प संतापले
CBS न्यूजच्या पत्रकार ओलिविया रिनाल्डी यांनी 18 एप्रिल रोजी इराणमधील परिस्थिती आणि होर्मुजमधील ताज्या घडामोडींवर प्रश्न विचारण्याचा प्रयत्न केला. यावेळी त्यांनी इराणकडून दोन भारतीय जहाजांवर झालेल्या हल्ल्याबाबतही प्रश्न विचारला. मात्र यानंतर डोनाल्ड ट्रम्प यांनी राग व्यक्त करत रिनाल्डी आणि इतर पत्रकारांना बाहेर जाण्यास सांगितले. रिनाल्डी यांनी नंतर हा व्हिडिओ पुन्हा शेअर करत लिहिले की, ‘मी ट्रम्प यांना होर्मुजमधील दोन जहाजांबद्दल विचारण्याचा प्रयत्न केला, ज्यांच्यावर कथितपणे इराणी गनबोट्सने गोळीबार केला होता. मात्र त्यानंतर राष्ट्राध्यक्ष ट्रम्प यांनी मला बाहेर जाण्यास सांगितले.’
ओलिविया रिनाल्डी या CBS न्यूजमध्ये व्हाइट हाऊस रिपोर्टर म्हणून कार्यरत आहेत. त्यांनी 2024 च्या अमेरिकन निवडणूक प्रचाराची रिपोर्टिंग केली असून, यापूर्वी त्या सीबीएस इव्हनिंग न्यूज विथ नोरा ओ’डोनेलमध्ये असोसिएट प्रोड्यूसर होत्या. त्यांनी तीन वर्षे नोराह ओ’डॉनेल यांच्यासोबत काम केले असून 60 मिनिट्स आणि CBS न्यूज संडे मॉर्निंग यांसारख्या कार्यक्रमांवरही काम केले आहे.
इराणला करार मान्य करावाच लागेल – ट्रम्प
डोनाल्ड ट्रंप यांनी सांगितले की, इराणने संघर्षविरामाचे गंभीर उल्लंघन केले आहे, मात्र तरीही शांतता करार शक्य आहे. त्यांनी म्हटले की, करार होणारच, चांगल्या मार्गाने किंवा कठीण मार्गाने. त्यांनी इराणला चांगली ऑफर दिल्याचा दावा केला आणि जर ती मान्य केली नाही, तर पूल आणि वीज प्रकल्पांवर हल्ले होऊ शकतात, असा इशाराही त्यांनी दिला आहे.
Leave a Reply