इन्स्टाग्रामवर ‘रील्स’ बनवण्याचा मोह भल्याभल्यांना आवरत नाही. कोविड महामारीच्या काळात इन्फ्लुएन्सर मिस्टर फैजूने ‘मेरे मेहबूब कयामत होगी’ या गाण्यावर एक रील बनवली होती, जी सोशल मीडियावर वाऱ्याच्या वेगाने व्हायरल झाली होती. याच रीलमुळे फैजू सोशल मीडिया स्टार बनला होता. नंतर या गाण्यावर रील्स बनवण्याचा एक ट्रेंडच सुरू झाला होता. त्यानंतर आता नीट पेपरफुटीप्रकरणी जेन-झींच्या आंदोलनादरम्यान याच गाण्यावर पुन्हा एकदा काही इन्फ्लुएन्सर्स रील्स बनवू लागले. रीक्रिएट केलेले हे रील्स सोशल मीडियावर व्हायरल होऊ लागले. या गाण्यावर रील बनवण्याचा मोह आता ज्येष्ठ अभिनेते अनुपम खेर यांनाही आवरला नाही. त्यांनी सहकलाकार आणि मित्र बमन इराणी, रणवीर शौरी, परवीन डबाव यांच्यासोबत मिळून भन्नाट रील बनवली आहे.
अनुपम खेर यांचा ‘खोसला का घोसला 2’ हा चित्रपट लवकरच प्रेक्षकांच्या भेटीला येणार आहे. त्यापूर्वी या चित्रपटातील सहकलाकारांसोबत त्यांनी ही रील बनवली आहे. बमन इराणी, रणवीर शौरी आणि परवीन डबाव यांच्यासोबत मिळून त्यांनी ‘मेरे मेहबूब कयामत होगी’ या गाण्यावर रील बनवत अनुपम खेर यांनी ट्रेंडला फॉलो केलं आहे. ही रील इतकी भन्नाट आहे की अवघ्या काही तासांत ती इंटरनेटवर तुफान व्हायरल झाली आणि त्याला 100 मिलियन म्हणजेच 100 दशलक्षांहून अधिक व्ह्यूज मिळाले आहेत.
पहा रील-
View this post on Instagram
या रीलला मिळत असलेला जबरदस्त प्रतिसाद पाहून रणवीर शौरीने एक्स अकाऊंटवर अनुपम खेर यांचे आभार मानले आहेत. ‘आम्हाला 100 मिलियनपेक्षा जास्त व्ह्यूजच्या क्लबमध्ये आणल्याबद्दल धन्यवाद’, अशी पोस्ट रणवीरने अनुपम खेर यांच्यासाठी लिहिली आहे. ही रील शेअर करताना अनुपम खेर यांनी मजेशीर कॅप्शनसुद्धा लिहिलं आहे. ‘खोसला आणि खुराना यांचं कधीच पटलं नाही, इथेसुद्धा नाही. जय हो!’
‘खोसला का घोसला 2’ हा चित्रपट 2006 मध्ये प्रदर्शित झालेल्या आणि गाजलेल्या ‘खोसला का घोसला’चा सीक्वेल आहे. या आगामी चित्रपटात पहिल्या चित्रपटातील मूळ कलाकारांसोबत काही नवीन चेहरेसुद्धा आहेत. प्रशांत बांगिया यांनी याचं दिग्दर्शन केलं आहे. यामध्ये अनुपम खेर, बमन इराणी, रणवीर शौरी, प्रवीण डबास, तारा शर्मा आणि किरण जुनेजा यांच्या भूमिका आहेत. हा चित्रपट येत्या 28 ऑगस्टला प्रदर्शित होणार आहे.
Leave a Reply