मुंबईत राष्ट्रवादी काँग्रेस पक्षाने (शरदचंद्र पवार गट) सुप्रिया सुळे यांच्या नेतृत्वाखाली महागाईविरोधात जोरदार आंदोलन केले. या आंदोलनात मोठ्या संख्येने महिला कार्यकर्त्या सहभागी झाल्या होत्या. तेल, डाळी, दूध, साखर, तांदूळ यांसारख्या जीवनावश्यक वस्तूंपासून ते रिक्षा आणि टॅक्सीच्या दरांपर्यंत सर्वकाही महागल्याने सामान्य नागरिकांचे बजेट कोलमडले आहे.
सुप्रिया सुळे यांनी सरकारवर टीका करताना म्हटले की, “सध्या काहीच स्वस्त राहिलेले नाही. दुकानात गेल्यावर वस्तूंच्या किमती पाहून धक्का बसतो.” गणेशोत्सव, दसरा आणि दिवाळीसारखे सण तोंडावर असताना सरकारने प्रचंड महागाई वाढवून कर भरणार्या कष्टकऱ्यांचे कंबरडे मोडण्याचे पाप केले आहे, असे त्या म्हणाल्या. सरकारकडून जीवनावश्यक वस्तूंवर कोणतीही सबसिडी दिली जात नसून, वाढत्या महागाईमुळे सर्वसामान्य, कष्टकरी, शोषित आणि वंचित घटकांना जगणे मुश्कील झाले आहे. महागाई कमी झालीच पाहिजे, ही आपली आग्रहाची भूमिका असल्याचे सुप्रिया सुळे यांनी स्पष्ट केले.
सुळे यांनी देशाच्या आर्थिक स्थितीवरही प्रश्नचिन्ह उपस्थित केले. जीडीपी वाढीबद्दल सरकार आणि तज्ञांच्या मतांमध्ये तफावत असल्याचे त्यांनी निदर्शनास आणून दिले. अनेक अर्थतज्ज्ञांनी तसेच रिझर्व्ह बँकेच्या माजी गव्हर्नरांनीही अपेक्षित वाढ होत नसल्याचे म्हटले आहे, याकडे त्यांनी लक्ष वेधले. अन्नपदार्थांच्या महागाईमुळे सर्वसामान्यांच्या घरातील परिस्थिती किती बिकट झाली आहे, हे घरी जाऊन आपल्या आई-बहिणीला विचारा, असे आवाहन त्यांनी केले.
यापूर्वी गरिबांना दिलासा देणारा आनंदाचा शिधा आता कुठे गायब झाला आहे, असा सवालही त्यांनी विचारला. लाडकी बहीण योजना यांसारख्या निवडणुकीच्या काळात सुरू झालेल्या योजनांमधून निवडणुकीनंतर जवळपास ८० लाख ते एक कोटी महिलांची नावे वगळण्यात आल्याची गंभीर बाबही त्यांनी नमूद केली. ज्या बहिणींनी सरकारला मतदान केले, त्यांना आता महागाईच्या रूपाने मोठी अडचण सहन करावी लागत असल्याचे सुळे यांनी सांगितले.
शेतकऱ्यांच्या आत्महत्यांचा मुद्दा उपस्थित करत, कर्जमाफीच्या जल्लोषानंतरही कष्टकरी शेतकऱ्यांना न्याय मिळत नसल्याचे त्यांनी म्हटले. काळ्या मातीशी इमान राखणाऱ्या अन्नदात्याला न्याय मिळत नाही, तर शहरात कष्ट करणाऱ्यांना महागाईचा सामना करावा लागत आहे, यामुळे जगायचे कसे, असा प्रश्न त्यांनी उपस्थित केला.
या आंदोलनादरम्यान, राज्यामध्ये जवळपास दोन कोटींहून अधिक मतदारांची नावे वगळण्यात आल्याचा मुद्दाही चव्हाट्यावर आला. लोकसभा विरोधी पक्षनेते राहुल गांधी यांनी लोकसभेत याबद्दल प्रश्न विचारला होता, असे सुप्रिया सुळे यांनी सांगितले. त्या म्हणाल्या की, मतदारांच्या यादीतील या घोळामुळे निवडणुकीत सत्ताधाऱ्यांकडून सत्तेत येण्याचा प्रयत्न सुरू आहे का, अशी शंका येते. सुप्रिया सुळे स्वतः आपल्या मतदारसंघात मतदारांच्या यादीच्या कामावर लक्ष ठेवून असल्याचे त्यांनी स्पष्ट केले.
Leave a Reply