शिवसेना पक्ष आणि धनुष्यबाण चिन्ह कोणाचे, या बहुचर्चित प्रकरणावर आज सर्वोच्च न्यायालयात महत्त्वाची सुनावणी पार पडली. शिवसेना उद्धव बाळासाहेब ठाकरे पक्षाच्या वतीने ज्येष्ठ विधिज्ञ कपिल सिब्बल यांनी जोरदार युक्तिवाद केला. निवडणूक आयोगाने एकनाथ शिंदे यांच्या गटाला शिवसेना पक्षाचे नाव आणि धनुष्यबाण चिन्ह देताना घेतलेल्या निर्णयावर कपिल सिब्बल यांनी प्रश्नचिन्ह उपस्थित केले. त्यांच्या युक्तिवादानंतर खासदार संजय राऊत यांनी प्रतिक्रिया देत न्यायालयाकडून न्याय मिळेल, असा विश्वास व्यक्त केला.
संजय राऊत म्हणाले की, हे घटनापीठ असून संविधानातील विविध कलमांची व्याख्या आणि घटनात्मक प्रश्नांवर येथे सुनावणी होत आहे. शिवसेना प्रकरणात पावलोपावली संविधान आणि पक्षाच्या घटनेचा भंग झाल्याचा दावा कपिल सिब्बल यांनी घटनात्मक दृष्टिकोनातून न्यायालयासमोर मांडला. निवडणूक आयोगाने घेतलेली प्रत्येक पायरी कशी चुकीची होती, याचे सविस्तर विवेचन सिब्बल यांनी केल्याचे राऊत यांनी सांगितले. हा युक्तिवाद भविष्यातील निकालासाठी महत्त्वाचा आणि ऐतिहासिक ठरू शकतो, असा विश्वासही त्यांनी व्यक्त केला.
शिवसेनेच्या 2018 मधील पक्षघटनेच्या वैधतेवरूनही सुनावणीदरम्यान महत्त्वाचे मुद्दे उपस्थित झाले. पक्षाची घटना संवैधानिक की असंवैधानिक, हे ठरवण्याचा निकष काय असणार, हा मुद्दा कपिल सिब्बल यांनी न्यायालयासमोर मांडल्याचे संजय राऊत यांनी सांगितले. 2018 मध्ये निवडणूक आयोगाने दिलेल्या मार्गदर्शक तत्त्वांचे उल्लंघन उद्धव ठाकरे गटाने केलेले नसून पक्ष सोडून गेलेल्या लोकांकडूनच उल्लंघन झाल्याचा दावा न्यायालयासमोर करण्यात आल्याचेही राऊत यांनी स्पष्ट केले.
शिवसेना फुटीच्या प्रकरणाचा निकाल केवळ एका पक्षापुरता मर्यादित राहणार नसून देशातील पक्षांतर आणि पक्षफुटीच्या राजकारणावर त्याचा परिणाम होऊ शकतो, असे संजय राऊत यांनी म्हटले. पक्षांतर बंदी कायद्याच्या पार्श्वभूमीवर देशात निर्माण झालेल्या परिस्थितीवर घटनापीठ ऐतिहासिक निर्णय देईल, अशी आशा असल्याचे त्यांनी सांगितले. त्यामुळे या प्रकरणाकडे केवळ शिवसेनेच्या पक्ष आणि चिन्हाच्या वादाच्या दृष्टीने न पाहता देशातील पक्षफुटी आणि पक्षांतराच्या राजकारणासाठी महत्त्वाचा निकाल म्हणून पाहिले जात असल्याचे राऊत यांच्या वक्तव्यावरून स्पष्ट होते.
दरम्यान, कपिल सिब्बल यांनी पक्षाचे नाव आणि निवडणूक चिन्ह दुसऱ्या गटाला देण्याचा अधिकार निवडणूक आयोगाला आहे का, यावरही प्रश्न उपस्थित केल्याचे संजय राऊत यांनी सांगितले. सिब्बल यांनी कलम 29 मधील तरतुदींचा संदर्भ न्यायालयासमोर मांडला असून, देशात झालेल्या विविध पक्षांतरांच्या घटनांकडेही त्यांनी न्यायालयाचे लक्ष वेधले आहे. हा अत्यंत महत्त्वाचा मुद्दा असल्याचे राऊत यांनी म्हटले.
कपिल सिब्बल यांच्या आजच्या युक्तिवादानंतर उद्धव ठाकरे गटामध्ये न्यायालयाकडून सकारात्मक निर्णयाची अपेक्षा निर्माण झाली आहे. “आम्हाला आता न्याय मिळेल, असा आत्मविश्वास वाटत आहे. आमचा कोर्टावर विश्वास आहे. एक आशेचा किरण आम्हाला दिसत आहे,” अशी प्रतिक्रिया संजय राऊत यांनी दिली. त्यामुळे सर्वोच्च न्यायालय या प्रकरणात पुढे कोणती भूमिका घेते आणि शिवसेना पक्ष व धनुष्यबाण चिन्हाच्या वादावर काय निर्णय होतो, याकडे महाराष्ट्रासह संपूर्ण देशाचे लक्ष लागले आहे.
Leave a Reply