दिल्लीतील जंतर-मंतर येथे सुरू असलेल्या आंदोलनाला आज शिवसेना (उद्धव बाळासाहेब ठाकरे) पक्षाचे राज्यसभा खासदार संजय राऊत यांनी भेट देत आंदोलनकर्त्यांशी संवाद साधला. आंदोलनाचे प्रमुख अभिजित दीपके यांच्यासह त्यांनी आंदोलनस्थळी उपस्थित राहून विद्यार्थी आणि आंदोलनकर्त्यांच्या मागण्यांना पाठिंबा दर्शवला.
यानंतर माध्यमांशी बोलताना संजय राऊत यांनी सांगितले की, शिवसेना पक्षप्रमुख उद्धव ठाकरे यांनी राजकारणापलीकडे जाऊन अभिजित दीपके आणि सोनम वांगचुक यांच्या आंदोलनाला पाठिंबा दिला आहे. शिवाजी पार्कवरील अलीकडील सभा तसेच पुणे आणि नागपूरमध्ये मोठ्या प्रमाणात युवकांचा प्रतिसाद मिळाल्याचा उल्लेख करत त्यांनी देशभरात आंदोलनाची ठिणगी पडल्याचे म्हटले.
दिल्लीतील आंदोलनादरम्यान झालेल्या पोलिस कारवाईवर टीका करत राऊत म्हणाले की, आंदोलनावर बळाचा वापर करणे हे लोकशाहीला शोभणारे नाही. त्यांनी आंदोलनकर्त्यांवरील कारवाईचा निषेध करत सरकारने संवादाच्या माध्यमातून प्रश्न सोडवावेत, अशी भूमिका मांडली.
संजय राऊत यांनी आंदोलनाला पाठिंबा कायम राहील, असे सांगताना गरज पडल्यास आपणही आंदोलनात सहभागी होऊ, असे स्पष्ट केले. आंदोलन देशहित आणि राष्ट्रहितासाठी असल्याचा दावा करत त्यांनी आंदोलन दडपण्याचा प्रयत्न केल्यास त्याचे परिणाम सरकारला भोगावे लागतील, असा इशाराही दिला.
यावेळी त्यांनी केंद्रीय शिक्षणमंत्री धर्मेंद्र प्रधान यांच्यावरही अप्रत्यक्ष टीका केली. विद्यार्थ्यांवर झालेल्या कारवाईबाबत सरकारने आत्मपरीक्षण करण्याची गरज असल्याचे त्यांनी म्हटले. तसेच आंदोलन करणाऱ्या युवकांना “दहशतवादी” म्हणणे योग्य नसल्याचे सांगत, हे देशातीलच विद्यार्थी असून त्यांच्या प्रश्नांकडे गांभीर्याने पाहिले पाहिजे, असे मत त्यांनी व्यक्त केले.
दरम्यान, दिल्लीतील आंदोलनाला विविध राजकीय पक्षांचा पाठिंबा वाढत असून, आंदोलनाच्या पार्श्वभूमीवर सत्ताधारी आणि विरोधकांमधील आरोप-प्रत्यारोप आणखी तीव्र होताना दिसत आहेत.
Leave a Reply