राष्ट्रवादी काँग्रेसचे नेते रोहित पवार यांनी राज्य सरकारला शेतकऱ्यांच्या कर्जमाफीसाठी १५ दिवसांचा अल्टिमेटम दिला आहे. राज्यातील दुष्काळसदृश परिस्थिती आणि पावसाच्या दडीमुळे शेतकरी अडचणीत असल्याने तातडीने कर्जमाफी जाहीर करण्याची त्यांनी मागणी केली.
पत्रकार परिषदेत बोलताना रोहित पवार यांनी अनेक राजकीय मुद्द्यांवरही भाष्य केले. अजित पवार गटाला वित्त खाते न मिळणे, तसेच मुंडवा जमीन प्रकरणी गृहविभागावर न्यायालयाकडून आलेल्या प्रश्नांमुळे त्यांच्या गटावर दबाव येऊ शकतो, असे त्यांनी नमूद केले. भाजप त्यांच्या मित्रपक्षांना कसे वागवते, हे यातून स्पष्ट होईल, असेही ते म्हणाले.
केंद्रीय मंत्री नितीन गडकरी यांनी मुंबई-गोवा महामार्गाच्या कामातील दिरंगाईवर घेतलेल्या भूमिकेचे पवारांनी स्वागत केले. त्याचवेळी, शक्तीपीठ मार्गाच्या ९५ कोटी रुपये प्रति किलोमीटर खर्चावर त्यांनी प्रश्नचिन्ह उपस्थित केले. राष्ट्रीय महामार्गाच्या आठ पदरी रस्त्याला ४५ कोटी रुपये प्रति किलोमीटर खर्च येत असताना, राज्य सरकारचा सहा पदरी रस्ता दुप्पट दराने का बांधला जातोय, असा सवाल करत गडकरींनी हा प्रकल्प हाती घ्यावा, अशी विनंती त्यांनी केली. यामुळे महाराष्ट्राचे ४०,००० कोटी रुपये वाचू शकतील, असे त्यांचे म्हणणे होते.
Leave a Reply