पुण्यातील स्वारगेट परिसरात महाराष्ट्र नवनिर्माण सेनेने (मनसे) एसीएफ स्टडी सेंटरवर धाड टाकत जोरदार आंदोलन छेडले. विद्यार्थ्यांची फसवणूक केली जात असल्याचा आरोप करत मनसेच्या कार्यकर्त्यांनी संस्थेविरोधात आक्रमक भूमिका घेतली. मिळालेल्या माहितीनुसार, संबंधित स्टडी सेंटर आवश्यक परवानग्या नसतानाही सुरू असल्याचा आरोप मनसेकडून करण्यात आला आहे. तसेच विद्यार्थ्यांकडून मोठ्या प्रमाणात शुल्क आकारून त्यांची दिशाभूल केली जात असल्याचाही दावा करण्यात आला.
या आरोपांच्या पार्श्वभूमीवर मनसे कार्यकर्त्यांनी स्टडी सेंटरबाहेर बॅनरबाजी करत निदर्शने केली. “बंद करा, बंद करा” अशा घोषणा देत कार्यकर्त्यांनी संस्थेविरोधात जोरदार आंदोलन केले. यावेळी परिसरात काही काळ तणावाचे वातावरण निर्माण झाले होते.
मनसेच्या पदाधिकाऱ्यांनी संबंधित संस्थेच्या कामकाजाची चौकशी करून योग्य ती कारवाई करण्याची मागणी प्रशासनाकडे केली आहे. विद्यार्थ्यांचे हित लक्षात घेऊन अशा संस्थांवर कठोर कारवाई करावी, अशी भूमिका आंदोलनकर्त्यांनी मांडली.
दरम्यान, या आंदोलनामुळे स्वारगेट परिसरात मोठी चर्चा रंगली असून, संबंधित आरोपांबाबत प्रशासन आणि स्टडी सेंटरकडून काय भूमिका घेतली जाते याकडे सर्वांचे लक्ष लागले आहे.
Leave a Reply