बिहारमधील बांकीपूर विधानसभा मतदारसंघ गेल्या अनेक वर्षांपासून भारतीय जनता पक्षाचा मजबूत बालेकिल्ला मानला जात होता. १९९५ पासून या मतदारसंघात भाजप किंवा त्यांच्या उमेदवारांनी सातत्याने विजय मिळवला आहे. सुरुवातीला नवीन किशोर प्रसाद सिन्हा आणि नंतर नितीन नवीन यांनी येथे भाजपाचे वर्चस्व कायम ठेवले होते. मात्र आता जन सुराज पक्षाचे प्रमुख प्रशांत किशोर यांनी या अभेद्य गडाला धक्का देत ऐतिहासिक विजय मिळवला आहे. या विजयामुळे आणि बांकीपूर पोटनिवडणुकीच्या निकालामुळे बिहारच्या राजकारणात मोठ्या बदलाचे संकेत मिळाले आहेत.
किती मतांनी झाला विजय?
प्रशांत किशोर यांनी १८ हजार ९५३ मतांनी विजय मिळवला. बांकीपूर विधानसभा पोटनिवडणुकीत ३१ फेऱ्यानंतर त्यांना ६३ हजार २०३ मते मिळाली. भाजपच्या उमेदवार नीरज कुमार सिन्हा यांना ४४ हजार २५० मते तर राष्ट्रीय जनता दलाच्या रेखा गुप्ता यांना १४ हजार ०८५ मते मिळाली.
पटना येथील या मतदारसंघाची मतमोजणी पूर्ण झाली असून त्यात मोठा राजकीय उलथापालथ झाल्याचे चित्र समोर आले आहे. भारत निवडणूक आयोगाच्या अधिकृत आकडेवारीनुसार जन सुराज पक्षाचे प्रशांत किशोर यांनी भाजपच्या नीरज कुमार सिन्हा यांचा पराभव केला. भाजपाचा पारंपरिक बालेकिल्ला मानल्या जाणाऱ्या बांकीपूरमध्ये प्रशांत किशोर पहिल्याच फेरीपासून आघाडीवर होते. आरजेडीच्या उमेदवार रेखा गुप्ता शर्यतीत पूर्णपणे मागे पडल्या. ३१ पैकी २२व्या फेरीअखेर प्रशांत किशोर यांनी १२ हजार ८०९ मतांची निर्णायक आघाडी घेतली होती.
तिरंगी लढत
या तिरंगी लढतीत सुरुवातीला जन सुराज आणि भाजप यांच्यात अटीतटीची स्पर्धा अपेक्षित होती. मात्र विरोधी पक्ष असलेल्या आरजेडीची कामगिरी अत्यंत निराशाजनक ठरली. बांकीपूरच्या मतदारांनी आरजेडीला स्पष्ट नकार दिल्याचे निकालावरून दिसून आले.
बांकीपूर विधानसभा मतदारसंघ अनेक दशकांपासून भाजपाचा अभेद्य किल्ला म्हणून ओळखला जातो. भाजपचे नेते नितीन नवीन राज्यसभेवर निवडून गेल्यानंतर ही जागा रिक्त झाली होती. त्यानंतर भाजपने येथून युवा चेहरा म्हणून नीरज कुमार सिन्हा यांना उमेदवारी दिली. मात्र स्थानिक मतदारांचा बदललेला कल ओळखण्यात भाजपकडून चूक झाल्याचे दिसून येते. प्रशांत किशोर यांनी आपल्या सक्रिय राजकीय कारकिर्दीची सुरुवात करण्यासाठी या शहरी मतदारसंघाची निवड केली आणि त्यांचा हा डाव यशस्वी ठरला. स्थानिक सवर्ण मतदारांमधील नाराजी आणि बदलाची अपेक्षा बाळगणाऱ्या युवकांचा पाठिंबा यामुळे या मोठ्या राजकीय उलथापालथीची पार्श्वभूमी तयार झाली. मतमोजणीच्या सुरुवातीपासूनच मिळत असलेल्या आघाडीमुळे पटना येथील जन सुराज पक्षाच्या कार्यकर्त्यांमध्ये उत्साहाचे वातावरण असून विजयाचा जल्लोष सुरू झाला आहे.
Leave a Reply