आषाढी वारीच्या पार्श्वभूमीवर आज सर्व संतांच्या मानाच्या पालख्या पंढरपूर तालुक्यात प्रवेश करणार आहेत. वारीतील अंतिम मुक्काम असलेल्या वाखरी येथे लाखो वारकरी एकत्र येणार असून, प्रशासनाकडून स्वागत आणि नियोजनाची सर्व तयारी पूर्ण करण्यात आली आहे.
पंढरपूर तालुक्यातील वाखरी हे आषाढी वारीतील शेवटचे विसाव्याचे ठिकाण मानले जाते. याच ठिकाणी विविध संतांच्या मानाच्या पालख्या एकत्र येतात. या ऐतिहासिक क्षणाचे साक्षीदार होण्यासाठी राज्यभरातून लाखो वारकरी वाखरीत दाखल होत आहेत.
काही दिवसांपूर्वी झालेल्या मुसळधार पावसामुळे वाखरी परिसरातील रस्त्यांवर मोठ्या प्रमाणात पाणी साचले होते. मात्र, प्रशासनाने तातडीने पाणी उपसून रस्त्यांचे सपाटीकरण पूर्ण केले आहे. त्यामुळे पालखी सोहळा आणि वारकऱ्यांच्या मुक्कामासाठी आवश्यक सुविधा उपलब्ध करण्यात आल्या आहेत.
दरम्यान, वाखरी येथे लाखो वारकरी मुक्काम करणार असल्याने सुरक्षा, वाहतूक, आरोग्य सेवा, पाणीपुरवठा आणि स्वच्छता यांसह सर्व यंत्रणा सज्ज ठेवण्यात आल्या आहेत. आषाढी एकादशीपूर्वी वाखरीत भक्तिमय वातावरण निर्माण झाले असून, विठ्ठलनामाच्या गजरात वारकऱ्यांचा उत्साह शिगेला पोहोचला आहे.
Leave a Reply