शिवसेना (उद्धव बाळासाहेब ठाकरे) गटातील खासदारांच्या बंडखोरीनंतर राज्याच्या राजकारणात मोठी खळबळ उडाली आहे. या पार्श्वभूमीवर धाराशिवचे खासदार ओमराजे निंबाळकर यांच्या पुढील राजकीय भूमिकेकडे सर्वांचे लक्ष लागले आहे. सुरुवातीला बंडखोर खासदारांमध्ये त्यांचे नाव चर्चेत असले तरी त्यांनी अद्याप अंतिम निर्णय घेतलेला नसून कार्यकर्त्यांशी चर्चा करूनच भूमिका जाहीर करणार असल्याचे स्पष्ट केले आहे.
मिळालेल्या माहितीनुसार, ओमराजे निंबाळकर धाराशिवमध्ये दाखल झाले असून गोवर्धनवाडी येथील आपल्या निवासस्थानी पोहोचले आहेत. त्यांच्या आगमनापूर्वीच मोठ्या संख्येने शिवसैनिक आणि समर्थक परिसरात जमले होते. गोवर्धनवाडी येथे पोहोचल्यानंतर त्यांनी दिवंगत पवनराजे निंबाळकर यांच्या समाधीस्थळाला भेट देऊन अभिवादन केले.
दरम्यान, त्यांच्या पुढील राजकीय वाटचालीबाबत महत्त्वाची बैठक आयोजित करण्यात आली आहे. या बैठकीत स्थानिक कार्यकर्ते, पदाधिकारी आणि समर्थकांशी चर्चा करून अंतिम निर्णय घेतला जाणार असल्याचे सांगितले जात आहे.
धाराशिवमध्ये सध्या राजकीय वातावरण तापलेले असून ठाकरे गटाचे कार्यकर्ते आक्रमक झाल्याचे चित्र दिसत आहे. काही कार्यकर्त्यांनी घोषणाबाजी करत ओमराजे यांनी ठाकरे गटासोबतच राहावे, अशी मागणी केली. दुसरीकडे, एकनाथ शिंदे यांच्या नेतृत्वाखालील शिवसेनेचे कार्यकर्तेही सक्रिय झाले असून ओमराजेंच्या समर्थनार्थ बॅनर झळकवण्यात आले आहेत.
कोणताही अनुचित प्रकार घडू नये यासाठी प्रशासनाने मोठा पोलीस बंदोबस्त तैनात केला आहे. ओमराजे निंबाळकर ठाकरे गटात राहणार की शिंदे गटात जाणार, याचा निर्णय लवकरच स्पष्ट होण्याची शक्यता असून राज्यातील राजकीय वर्तुळाचे लक्ष सध्या धाराशिवकडे लागले आहे.
Leave a Reply