MPSC Paper Leak : एमपीएससी पेपरफुटी प्ररणात रोजच नवनवे आणि धक्कादायक असे खुलासे होत आहेत. प्रेमप्रकरण आणि नंतर झालेले ब्रेकअप यातून हा पेपरफुटीचा घाट रचला गेल्याचे प्राथमिक तपासात समोर आले आहे. आतापर्यंत या प्रकरणात अनेक बड्या सरकारी अधिकाऱ्यांसह पेपरफुटीतील दलाल तसेच इतर आरोपींना बेड्या ठोकण्यात आल्या आहेत. महाराष्ट्र लोकसेवा आयोगाच्या माध्यमातून घेण्यात आलेल्या औषध निरीक्षक पदाच्या परीक्षेत पेपरफुटीचा हा प्रकार घडला होता. दरम्यान, आता या प्रकरणात आरोपी असलेले अमृत पाटील यांच्याबाबत आता धक्कादायक माहिती समोर आली आहे.
मुलीसाठी एमपीएससीचा पेपर फोडल्याचा आरोप
पेपरफुटी प्रकरणात ऋतुजा पाटीलचे वडील अमृत पाटील यांचा सर्वात मोठा सहभाग असल्याचे समोर आले आहे. अमृत पाटील हे नंदुरबारच्या परिवर्धा जिल्हा परिषदेच्या शाळेत मुख्याध्यापक म्हणून कार्यरत होते. अमृत पाटील यांना राज्य शासनाचा उत्कृष्ट शिक्षक पुरस्कार देखील मिळाला होता. मात्र, याच उत्कृष्ट शिक्षकाने आपल्या मुलीसाठी एमपीएससीचा पेपर फोडल्याचा आरोप समोर आले आहे. ही पेपरफुटी करताना नंदुरबारच्या कौटिल्य अकॅडमीचे संचालक प्रवीण पाटील यांना अमृत पाटील यांनी लाखो रुपये देऊन प्रश्नपत्रिका खरेदी केल्याचे समोर आले आहे.
राज्य शासनाकडून मिळाला उत्कृष्ट शिक्षकाचा पुरस्कार
अमृत पाटील यांनी प्रश्नपत्रिका मिळवल्यानंतर ती केवळ आपल्या मुलीलाच दिली होती की इतरांनाही उपलब्ध करून दिली होती, याचा आता तपास केला जात आहे. राज्य शासनाकडून उत्कृष्ट शिक्षकाचा पुरस्कार मिळवलेल्या व्यक्तीवरच शिक्षकपदाला कलंक लावला असे म्हणत संताप व्यक्त केला जातोय. या प्रकरणात आणखी काही जणांची नावे समोर येण्याची शक्यता आहे.
लव्हस्टोरीचा अँगल नेमका काय?
या प्रकरणातील आरोपी ऋतुजा पाटील आणि गौरव पाटील यांचे एकमेकांवर प्रेम होते. परंतु ब्रेकअप झाल्याने गौरव पाटील यानेच एमपीएससीला पेपरफुटी झाल्याचे सांगितले होते. ऋतुजा पाटीलचे वडील अमृत पाटील यांनी पेपर फोडण्यासाठी प्रवीण पाटील या दलालाची मदत घेतली होती. ऋतुजाने हाच पेपर प्रेमापोटी गौरव पाटीलालाही दिला होता. ऋतुजा या पेपरमध्ये पास झाली होती. परंतु ऋतुजा आणि गौरव यांच्यात वाद झाल्यानंतर गौरवनेच एमपीएससीकडे ऋतुजाविरोधात तक्रार केली होती.
Leave a Reply