आयपीएल 2026 स्पर्धेची सांगता झाल्यानंतर आता टीम इंडिया आंतरराष्ट्रीय क्रिकेटसाठी सज्ज झाली आहे. टीम इंडिया आयपीएल स्पर्धेच्या 19 व्या मोसमानंतर अफगाणिस्तान विरुद्ध मैदानात उतरणार आहे. टीम इंडिया अफगाणिस्तान विरुद्ध 6 जूनपासून एकमेव कसोटी सामना खेळणार आहे. या सामन्यात शुबमन गिल टीम इंडियाचं नेतृत्व करणार आहे. उभयसंघातील सामना हा मुल्लानपूरमधील महाराजा यादवेंद्र आंतरराष्ट्रीय क्रिकेट स्टेडियममध्ये आयोजित करण्यात आला आहे.
अफगाणिस्तान आणि टीम इंडिया या दोन्ही संघांची कसोटी क्रिकेटमध्ये आमनेसामने येण्याची ही दुसरीच वेळ असणार आहे. टीम इंडियाने 2018 साली अफगाणिस्तावर अजिंक्य रहाणे याच्या नेतृत्वात एका डावाने विजय मिळवला होता. आता टीम इंडिया अफगाणिस्तानवर किती मोठा विजय मिळवणार? याची चाहत्यांना प्रतिक्षा असणार आहे. मात्र टीम इंडियाला सामना जिंकल्यानंतरही वर्ल्ड टेस्ट चॅम्पियनशीप 2025-2027 च्या पॉइंट्स टेबलमध्ये काडीचाही फायदा होणार नाही. या निमित्ताने टीम इंडिया डब्ल्यूटीसी पॉइंट्स टेबलमध्ये कितव्या स्थानी आहे? हे जाणून घेऊयात.
टीम इंडिया कितव्या स्थानी
ताज्या आकडेवारीनुसार, टीम इंडिया वर्ल्ड टेस्ट चॅम्पियनशीप 2025-2027 च्या पॉइंट्स टेबलमध्ये सहाव्या स्थानी आहे. त्यामुळे टीम इंडियासाठी या साखळीच्या अंतिम फेरीत पोहचंण प्रचंड आव्हानात्मक ठरणार आहे. टीम इंडियाची टक्केवारी ही 48.15 अशी आहे. तर ऑस्ट्रेलिया पॉइंट्स टेबलमध्ये पहिल्या स्थानी विराजमान आहे. ऑस्ट्रेलियाची टक्केवारी ही 87.50 अशी आहे. डब्ल्यूटीसी पॉइंट्स टेबलमध्ये पॉइंट्सच्या टक्केवारीनुसार स्थान निश्चित होतं.
न्यूझीलंड क्रिकेट टीम पॉइंट्स टेबलमध्ये दुसऱ्या आणि गतविजेता दक्षिण आफ्रिका तिसऱ्या स्थानी आहे. श्रीलंका चौथ्या क्रमांकावर आहे. बांग्लादेश पाचव्या स्थानी आहे. तर इंग्लंड, पाकिस्तान आणि वेस्टइंडिज तिन्ही संघ पॉइंट्स टेबलमध्ये अनुक्रमे सातव्या, आठव्या आणि नवव्या स्थानी आहेत.
भारताला विजयानंतर पॉइंट्स का मिळणार नाही? जाणून घ्या कारण
दरम्यान अफगाणिस्तान विरुद्ध विजयी झाल्यानंतरही टीम इंडियाला मिळणारे गुण हे डब्ल्यूटीसी पॉइंट्स टेबलमध्ये जोडले जाणार नाहीत. त्याचं कारणही तसंच आहे. अफगाणिस्तान वर्ल्ड टेस्ट चॅम्पियनशीप 2025-2027 साखळीचा भाग नाही. या साखळीत एकूण 9 संघ सहभागी आहेत.
Leave a Reply