भारत आणि अमेरिकेत लवकरच व्यापार करार होणार आहे. त्याआधी अमेरिकी राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी यांचं भरभरुन कौतुक केलं आहे. पंतप्रधान मोदी माझे खूप चांगले मित्र आहेत, असं ट्रम्प म्हणाले. व्हाइट हाऊसमध्ये पत्रकारांशी बोलताना ट्रम्प म्हणाले की, “मला पंतप्रधान मोदी आवडतात. ते माझे चांगले मित्र आहेत. आमच्यात चांगलं नातं आहे. आम्ही लवकरच एक डील करणार आहोत” ट्रम्प यांनी मोदींचं कौतुक केलं असलं तरी ते हे सुद्धा म्हणाले की, “भारत अनेक वर्षांपासून अमेरिकी कंपन्यांवर जास्त टॅरिफ आकारतोय. भारतात अमेरिकी कंपन्यांवर मोठा टॅरिफ लावला जायचा. पण अमेरिकेकडून भारतीय कंपन्यांवर असं शुल्क आकारलं जात नव्हतं” रशियाचे राष्ट्राध्यक्ष व्लादिमीर पुतिन यांनी सुद्धा पंतप्रधान मोदींचं कौतुक केलय.
भारत-अमेरिकेत व्यापार करारासंबंधी चर्चा सुरु असताना ट्रम्प यांनी हे वक्तव्य केलय. या आठवड्यात अमेरिकी शिष्टमंडळ भारतात आलं होतं. दोन्ही देशांच्या अधिकाऱ्यांमध्ये चार दिवस व्यापार करारावर चर्चा झाली. चर्चा सकारात्मक झाली असं भारताच्या व्यापार मंत्रालयाकडून सांगण्यात आलं आहे. भारत-अमेरिका दोन्ही देशांचं हित साधलं जाईल असा करार करण्याचा दोन्ही देशांचा प्रयत्न आहे.व्यापार मंत्रालयानुसार दोन्ही देश व्यापार, आर्थिक संबंध अधिक मजबूत करण्यासाठी एकत्र काम करतायत.
मोदींवर दबाव टाकणं हानीकारक
“रशिया सोबतचे भारताचे जे संबंध आहेत, सहकार्य आहे, त्यावरूनही अमेरिकेकडून भारतावर दबाव टाकण्याचा प्रयत्न होत आहे. पण आता हे सगळ्यांच्या लक्षात आलय की, जगतील सर्वाधिक लोकसंख्या असलेला देश आणि पीएम मोदींवर दबाव टाकणं हे आंतरराष्ट्रीय आणि द्विपक्षीय संबंधांसाठी हानीकारक आहे” असं पुतिन म्हणाले. भारत जगातील प्रमुख अर्थव्यवस्थांपैकी एक आहे. त्यांचा प्रभावी आर्थिक विकास दर आहे असं पुतिन म्हणाले.
रशियाच्या दृष्टीने भारत एक विश्वासू मित्र
येणाऱ्या वर्षांमध्ये भारत-रशिया द्विपक्षीय व्यापार 100 अब्ज अमेरिकी डॉलरपर्यंत पोहोचेल असा विश्वास पुतिन यांनी व्यक्त केला.”रशियाच्या दृष्टीने भारत एक विश्वासू मित्र आहे. कुठल्याही अन्य देशांसोबतचे भारताचे द्विपक्षीय संबंध रशियाला नकारात्मक वाटत नाहीत. भारत एक महान लोकशाही प्रधान देश आहे. ते आपल्या राष्ट्रीय हितांची काळजी घेतात” असं पुतिन म्हणाले.
Leave a Reply