दिल्लीच्या जंतर-मंतरवर नीट पेपरफुटी प्रकरणाच्या विरोधात आंदोलनात आंदोलकांना जेवणाची सोय उपलब्ध करून देणाऱ्या मोहम्मद जुनैदने पोलिसांवर गंभीर आरोप केला आहे. आंदोलनानंतर दिल्ली पोलिसांनी ताब्यात घेतलं. त्यानंतर रात्रभर डोळ्यावर पट्टी बांधून आंदोलकांना जेवणाची व्यवस्था आणि फंडिगविषयी चौकशी केली. पोलिसांनी गाझियाबादमधील घरी पोहोचून कुटुंबातील सदस्यांची देखील चौकशी केल्याचा आरोप जुनैदच्या कुटुंबीयांनी केला आहे. परंतु गाझियाबाद पोलिसांनी आरोप फेटाळून लावले आहेत. जुनैदच्या वडिलांना नियमित चौकशीसाठी बोलावलं होतं. चौकशीनंतर त्यांना घरी सोडण्यात आल्याचे पोलिसांनी स्पष्ट केले.
गेल्या काही दिवसांपासून सोशल मीडियावर मोहम्मद जुनैद हा आंदोलक चर्चेत आहे. जंतर-मंतरच्या आंदोलनात मोहम्मद जुनैद हा मोफत जेवण आणि पाणी वाटप करताना दिसत होता. परंतु आंदोलन संपल्यानंतर मोहम्मद जुनैद आणि त्याच्या कुटुंबीयांची चौकशी करण्यात आल्याचे समोर आलं. त्यानंतर सोशल मीडियावर चर्चांना एकच उधाण आलं.
मोहम्मद जुनैदचं म्हणणं आहे की, मला 24 जुलै रोजी रात्री दिल्ली पोलिसांनी अचानक रोखलं. मला 24 जुलैच्या रात्री 10.50 ते 10.55 वाजेदरम्यान एका कुत्र्याने चावलं. त्यामुळे मी राम मनोहर लोहिया रुग्णालयात पोहोचलो. रुग्णालयातून उपचार घेतल्यानंतर जवळपास रात्री 12.10 वाजता रिक्षा पकडत होतो. रुग्णालयातून बाहेर पडल्यानंतर रिक्षाने निघालो. रिक्षा काही अंतरावर पोहोचल्यानंतर काहींनी माझी रिक्षा थांबवली. काही जण माझ्यावर हल्ला करायला आले होते. त्यांनी मला दिल्ली पोलीस असल्याचे सांगितले. त्यांनंतर मला ओळखपत्र दाखवायला सांगितले. परंतु त्यांनी माझ्या डोळ्यावर पट्टी बांधून अज्ञातस्थळी नेलं. त्यांनी रात्रभर डोळ्यावर पट्टी काढली नाही. त्यानंतर दुसऱ्या दिवशी सकाळी चौकशी केली’.
‘आंदोलनात वाटण्यात येणाऱ्या जेवणाची व्यवस्था कुठून केली जात होती. त्यासाठी कोण पैसे देत होते? असे प्रश्न चौकशीत विचारल्याचे जुनैदने सांगितले. त्याने चौकशीत सांगितले की, ‘जेवणाची व्यवस्था वेगवेगळे आंदोलक करत होते. काही लोक ऑनलाइन प्लॅटफॉर्मद्वारे जेवण मागवत होते. तर काही जण स्वत:च्या घरातून जेवण आणि पाणी घेऊन येत होते. चौकशीनंतर त्यांना उत्तराखंडच्या मसुरी येथे सोडण्यात आलं. त्यानंतर मसुरीहून दिल्लीला टॅक्सीने पोहोचल्याचे त्याने सांगितले. या चौकशीनंतरही जुनैदने कॉक्रोच जनता पक्षाच्या आंदोलनाचं समर्थन केलं. तर सीजेपीच्या आंदोलकांनीही वेळोवेळी मदत केल्याचं सांगितले. आता संघटनेची कायदेशीर टीम आता काम करत असल्याचे सांगितले. तर सीजेपीची प्रवक्ता रत्ना सिंह यांच्याशी एक ते दोन वेळा बोलणे झाल्याचेही त्यांनी सांगितले.
Leave a Reply