‘सर सलामत तो पगडी हजार’, ही हिंदी म्हण तर तुम्ही ऐकलीच असेल. याचा अर्थ असा होतो की, आरोग्य आणि शरीर चांगलं राहिलं की, आयुष्यात कोणतीही कामे करता येतात. पण आरोग्यच उत्तम नसेल, तर त्याचा परिणाम फार वाईट होते. आरोग्य उत्तम ठेवण्यासाठी सर्वात महत्त्वाची गोष्ट म्हणजे झोप. झोप आरोग्यासाठी फार गरजेची आहे.. आरोग्य तज्ज्ञांच्या मते, निरोगी आयुष्यासाठी रात्री किमान 7 तास झोप घेणे आवश्यक आहे. मात्र, आधुनिक जीवनशैली आणि कामाच्या ताणामुळे अनेक लोक झोपेकडे दुर्लक्ष करतात. जर तुम्ही सहा तासांपेक्षा कमी झोपलात तर, त्याचे किती वाईट परिणाम तुमच्य शरीरावर होतील जाणून घ्या…
मधुमेह : जेव्हा तुम्ही सहा तासांपेक्षा कमी झोपता, तेव्हा तुमच्या शरीरातील भूक आणि चयापचयावरील संप्रेरकीय नियंत्रण बदलते. अभ्यासातून असेही दिसून आले आहे की, सात ते आठ तास झोपण्याच्या तुलनेत, केवळ पाच ते सहा तास झोपल्याने प्री-डायबिटीज किंवा टाईप 2 मधुमेह होण्याचा धोका दुप्पट होतो.
हृदयरोग : रात्री सहा तासांपेक्षा कमी झोपणे हे हृदयाच्या आरोग्यासाठी देखील वाईट आहे. सुमारे 4 हजार लोकांच्या अभ्यासात असे आढळून आले की, जे लोक रात्री सहा तासांपेक्षा कमी झोपतात, त्यांना सात ते आठ तास झोपणाऱ्यांच्या तुलनेत व्यापक एथेरोस्क्लेरोसिस होण्याची शक्यता 27% जास्त असते.
मेंदूची कार्ये : झोपेच्या कमतरतेचा परिणाम केवळ शरीरावरच होत नाही, तर मेंदूवरही होतो. आपली झोप कमी झाली, तर आपली एकाग्रता आणि निर्णय घेण्याची क्षमता कमी होते. स्मरणशक्ती कमी होते. याव्यतिरिक्त, आपल्याला दिवसा खूप जास्त झोप आणि सुस्ती येऊ शकते.
रोगप्रतिकारक प्रणाली : रोगप्रतिकार प्रणालीच्या योग्य कार्यासाठी, संसर्गाशी लढण्यासाठी आणि दाह नियंत्रित करण्यासाठी झोप महत्त्वाची भूमिका बजावते. परंतु सहा तासांपेक्षा कमी झोप रोगप्रतिकार कार्यावर आणि चयापचय क्रियेवर नकारात्मक परिणाम करू शकते.
थायरॉईड कार्ये : झोपेच्या वेळी, तुमचे शरीर ग्रोथ हार्मोन स्रवते आणि थायरॉईडचे कार्य व चयापचय प्रक्रियांचे नियमन करते. परंतु जर तुमची झोप कमी झाली, तर या कार्यांमध्ये अडथळा येऊ शकतो. यामुळे हाडांचे आरोग्य खालावू शकते आणि शरीराची एकूणच झीज होऊ शकते.
मूड : सतत झोपेच्या कमतरतेमुळे तुमच्या मनःस्थितीवर गंभीर परिणाम होऊ शकतो. याचा मेंदूतील डोपामाइन आणि सेरोटोनिनसारख्या हार्मोन्सच्या पातळीवर परिणाम होऊन तीव्र नैराश्य आणि चिंता निर्माण होऊ शकते. सर्वात महत्त्वाची गोष्ट म्हणजे, कोणत्याही आरोग्याच्या समस्येसाठी तुमच्या डॉक्टरांचा सल्ला नक्की घ्या.
Leave a Reply