हिंदी चित्रपटसृष्टीतील अनेक गाणी शेजारील देशातील संगीतापासून प्रेरित असल्याचे आरोप यापूर्वी झाले आहेत. 1990 मध्ये प्रदर्शित झालेल्या ‘यादों के मौसम’ या चित्रपटातील ‘दिल दिल हिंदुस्तान’ हे देशभक्तीपर गाणेही अशाच वादात सापडले होते.
गायक विजय बेनेडिक्ट यांनी गायलेल्या या गाण्याला आनंद-मिलिंद यांनी संगीत दिले होते. किरण कुमार आणि विक्रांत यांच्यावर चित्रित करण्यात आलेले हे गाणं प्रदर्शित झाल्यानंतर भारतात चांगलेच लोकप्रिय झाले. त्याच्या जोशपूर्ण संगीतामुळे आणि देशप्रेमाची भावना जागवणाऱ्या शब्दांमुळे प्रेक्षकांनी गाण्याचे कौतुक केले.
मात्र, गाणं प्रदर्शित झाल्यानंतर त्याच्या चाल, शब्द आणि संकल्पनेवर प्रश्न उपस्थित झाले. हे गाणं 1987 मध्ये पाकिस्तानच्या प्रसिद्ध Vital Signs या पॉप बँडने सादर केलेल्या ‘दिल दिल पाकिस्तान’ या देशभक्तीपर गाण्याशी संबंधीत असल्याचा आरोप करण्यात आला.
‘दिल दिल पाकिस्तान’ हे गाणं प्रसिद्ध पाकिस्तानी गायक जुनैद जमशेद यांच्या आवाजात लोकप्रिय झाले होते. पाकिस्तानमध्ये हे गाणं मोठ्या प्रमाणावर गाजले आणि त्या काळातील अनेक तरुणांच्या तसेच मुलांच्या ओठांवर त्याचा प्रभाव होता.
देशभक्तीची भावना जागवणारे हे गाणं पाकिस्तानच्या पॉप संगीताच्या इतिहासातील एक लोकप्रिय गाणं मानले जाते. याच पार्श्वभूमीवर ‘दिल दिल हिंदुस्तान’च्या संगीतावर प्रेरणा घेतल्याचे आरोप झाले. त्यामुळे भारतातील हे गाजलेले देशभक्तीपर गाणं कौतुकासोबतच चर्चेचा आणि वादाचा विषयही ठरले.
Leave a Reply