जगातील सर्वात मोठ्या फुटबॉल स्पर्धेची फिफा विश्वचषक २०२६ ची धमाकेदार सुरुवात झाली आहे. अमेरिका, कॅनडा आणि मेक्सिको यांच्या संयुक्त आयोजनात होणाऱ्या या स्पर्धेत यंदा प्रथमच ४८ संघ सहभागी होत आहेत. १९ जुलैपर्यंत चालणारा हा विश्वचषक आतापर्यंतचा सर्वात मोठा विश्वचषक ठरणार आहे. संपूर्ण जग फुटबॉलच्या या महाकुंभात मग्न असतानाच, फुटबॉल इतिहासातील एक अत्यंत हृदयद्रावक आणि काळी घटना पुन्हा एकदा आठवणीत आली आहे. ही घटना आजही फुटबॉल जगताला हादरवून सोडते.
१९९३ ची भीषण विमान दुर्घटना
२७ एप्रिल १९९३… फिफा विश्वचषक १९९४ च्या qualifiers साठी झांबियाचा राष्ट्रीय फुटबॉल संघ सेनेगलमध्ये खेळण्यासाठी निघाला होता. डकार येथे होणाऱ्या सामन्यासाठी झांबियाच्या वायुसेनेने (Zambian Air Force) संघासाठी विशेष विमानाची व्यवस्था केली होती. विमानात १८ खेळाडू, सपोर्ट स्टाफसह एकूण ३१ जण होते. लांबच्या प्रवासामुळे विमानाला इंधन भरण्यासाठी तीन वेळा थांबणे अपेक्षित होते.
इंजिन बिघाड आणि वैमानिकाची चूक
प्रथम ब्राझाव्हिल येथे विमान थांबले. तेथे इंजिनमध्ये तांत्रिक बिघाड असल्याचे समोर आले, तरीही विमान पुढे निघाले. दुसऱ्या इंधन भरण्यासाठी लिबरव्हिल (गॅबॉन) येथे विमान उतरले. इंधन भरून उड्डाण केल्यावर अवघ्या काही क्षणातच विमानाच्या डाव्या इंजिनला आग लागली. आणीबाणीच्या स्थितीत घाबरलेल्या वैमानिकाने एक मोठी चूक केली. त्याने आग लागलेले डावे इंजिन बंद करण्याऐवजी चुकून उजवे (चालू) इंजिन बंद केले. यामुळे विमानाची उरलेली शक्तीही संपली आणि ते लिबरव्हिल विमानतळापासून फक्त ५०० मीटर अंतरावर अटलांटिक महासागरात कोसळले.
विमानातील सर्वांचा मृत्यू
दुसऱ्या दिवशी सकाळी विमानातील सर्व ३१ जणांचे मृतदेह समुद्रकिनाऱ्यावर आढळले. यात झांबियाचे १८ प्रमुख खेळाडू आणि मुख्य प्रशिक्षकांचा समावेश होता. २००३ मध्ये गॅबॉन सरकारने प्रकाशित केलेल्या तपास अहवालानुसार, वैमानिकाचा थकवा, विमानातील खराब उपकरणे आणि कॉकपिटमधील सावधान दिवे (warning lights) बिघडलेले असल्याने ही दुर्घटना घडली. आजही, तीन दशकांनंतरही ही घटना फुटबॉल इतिहासातील सर्वात मोठ्या शोकांतिकांपैकी एक मानली जाते.
Leave a Reply