गेल्या काही दिवसांपासून देशात इथेनॉल मिश्रित इंधन म्हणजेच E20 पेट्रोलवरून वाद सुरू आहे. अनेक वाहन चालकांनी हे इंधन वाहनांसाठी धोकादायक असल्याचे म्हटले आहे. तर सरकारकडून हे इंधन वाहनांना कोणतेही नुकसान पोहोचवत नसल्याचे सांगितले जात आहे. या मुद्द्यावरून आम आदमी पक्षाचे संयोजक अरविंद केजरीवाल केंद्र सरकारला सातत्याने घेरत आहेत. काही दिवसांपूर्वी केजरीवाल यांनी E20 च्या विरोधात पंतप्रधानांच्या निवासस्थानापर्यंत पायी मोर्चा काढला होता. आता त्यांनी एका विनोदाच्या माध्यमातून पुन्हा एकदा सरकारवर निशाणा साधला आहे. केजरीवाल यांनी नेमकं काय म्हटलं ते जाणून घेऊयात.
अरविंद केजरीवाल यांचा सरकारवर निशाणा
अरविंद केजरीवाल यांनी एक्सवर एक व्हिडिओ शेअर केला आहे. यात त्यांनी म्हटले की, ‘आपल्या देशात E20 कशाप्रकारे लागू केले जात आहे, हे मी तुम्हाला एका विनोदातून समजावून सांगतो.’ त्यानंतर केजरीवाल यांनी विनोद सांगण्यास सुरुवात केली. केजरीवाल म्हणाले की, ‘एकदा अमेरिका, रशिया आणि भारत या तीन देशांच्या पोलिसांमध्ये स्पर्धा होते. जंगलात एक सिंह सोडला जातो आणि तिन्ही देशांच्या पोलिसांना तो शोधून आणण्यास सांगितले जाते.’
काय म्हणाले केजरीवाल?
केजरीवाल पुढे म्हणाले, सर्वप्रथम ट्रम्प यांचे पोलीस जंगलात गेले आणि 24 तासांत सिंहाला शोधून आणले. त्यानंतर पुतिन यांचे पोलीस गेले आणि त्यांनी एका तासात सिंहाला शोधून आणले. मात्र, मोदीजींच्या पोलिसांना पाठवण्यात आल्यानंतर ते तीन दिवस परतले नाहीत. त्यानंतर सर्वजण जंगलात गेले, तेव्हा मोदीजींचे पोलीस एका कुत्र्याला पकडून त्याला बेदम मारहाण करताना दिसले. ते त्याला म्हणत होते… सांग, मी सिंह आहे.’ केजरीवाल यांनी या विनोदाचा संबंध E20 पेट्रोलशी जोडताना म्हटले की, ‘सध्या सरकारने देशाचीही अशीच अवस्था केली आहे. 140 कोटी लोकांना मारहाण करत आहेत आणि म्हणत आहेत… सांग, E20 योग्य आहे.”
हमारे देश में E 20 कैसे लागू किया जा रहा है, आइए मैं आपको एक चुटकुले से समझाता हूँ। pic.twitter.com/k740m5K7sD
— Arvind Kejriwal (@ArvindKejriwal) August 9, 2026
अरविंद केजरीवाल गेल्या काही आठवड्यांपासून सातत्याने E20 पेट्रोलला विरोध करत आहेत. अलिकडेच त्यांनी नवी दिल्लीतील कॉन्स्टिट्यूशन क्लबमध्ये ‘नॅशनल टाउन हॉल अगेंस्ट E20’ या कार्यक्रमाचे आयोजन केले होते. यावेळी त्यांनी दावा केला होता की, ‘E20 मुळे केवळ वाहनांचे मायलेज कमी होत नाही, तर वाहनांचे पार्ट्सही खराब होत आहेत.’
केजरीवालांच्या 3 मागण्या
केजरीवाल यांनी केंद्र सरकारसमोर तीन मागण्या केल्या आहेत. पहिली मागणी म्हणजे, ‘देशातील सर्व पेट्रोल पंपांवर E20 इंधनासोबत शुद्ध पेट्रोलचा पर्यायही उपलब्ध करून द्यावा. दुसरी मागणी म्हणजे, ‘इथेनॉल मिश्रित E20 इंधनाची किंमत शुद्ध पेट्रोलपेक्षा कमी असावी. तिसरी मागणी म्हणजे, पेट्रोलची किंमत प्रति लिटर 84 रुपयांपेक्षा कमी असावी.’
Leave a Reply