2002 साली प्रदर्शित झालेला 'एक छोटी सी लव्ह स्टोरी' हा चित्रपट त्या काळात प्रचंड वादाच्या भोवऱ्यात सापडला होता. चित्रपटात मनीषा कोईराला मुख्य भूमिकेत होती तर दिग्दर्शनाची जबाबदारी शशिलाल के. नायर यांनी सांभाळली होती.
या चित्रपटाची कथा एका 26 वर्षीय महिलेभोवती फिरते, जिच्यावर शेजारी राहणारा 15 वर्षांचा मुलगा प्रेम करू लागतो. त्या काळात अशा धाडसी विषयांवर फार कमी चित्रपट बनत होते. मात्र या चित्रपटामुळे सर्वाधिक चर्चा झाली ती मनीषा कोईरालाच्या कथित बोल्ड आणि सेमी-न्यूड सीनची.
रिपोर्टनुसार, चित्रपट साइन करताना मर्यादित बोल्ड सीन असतील असे अभिनेत्रीला सांगण्यात आले होते. पण अंतिम एडिटमध्ये तिच्या परवानगीशिवाय बॉडी डबल वापरून काही अतिधाडसी सीन शूट करून चित्रपटात समाविष्ट करण्यात आल्याचा आरोप करण्यात आला.
हे सीन पाहिल्यानंतर मनीषा कोईराला संतप्त झाल्या आणि त्यांनी चित्रपटाच्या प्रदर्शनावर बंदी आणण्यासाठी न्यायालयात धाव घेतली. त्यांनी कोर्टात मागणी केली की बॉडी डबलसह शूट केलेले बोल्ड सीन हटवावेत. प्रकरण गाजू लागल्यानंतर त्यांनी बाळ ठाकरे यांचीही मदत मागितल्याचे सांगितले जाते.
दरम्यान, दिग्दर्शकांनी कोर्टात दावा केला की बॉडी डबल वापरण्याची माहिती अभिनेत्रीला आधीपासून होती. चित्रपटाच्या टीमनेही चित्रपटात अश्लील सीन नसल्याचे स्पष्ट केले. अखेरीस कोर्टाने चित्रपटाच्या प्रदर्शनावर स्थगिती देण्यास नकार दिला. वादांच्या भोवऱ्यात अडकूनही ‘एक छोटी सी लव्ह स्टोरी’ बॉक्स ऑफिसवर यशस्वी ठरला.
Leave a Reply