बॉलिवूड इंडस्ट्रीतील प्रसिद्ध गायक सोनू निगमने कर्जमधील आपली जमीन विकली आहे. मिळालेल्या माहितीनुसार, सोनू निगमने पाच एकमेकांना लागून असलेले भूखंड विकले आहेत. तब्बल 95 लाख रुपयांना हा करार झाल्याची माहिती समोर येत आहे. ‘CRE’ मॅट्रिक्सला मिळालेल्या मालमत्ता नोंदणीच्या कागदपत्रांनुसार, जवळपास महिनाभरापूर्वीच सोनूने याच भागातील एक जमीन 1.95 कोटी रुपयांना विकली होती. आता कर्जतच्या सावेले गावातील पाच लागून असलेल्या भूखंडांशी संबंधित त्याने हा व्यवहार केला आहे. या भूखंडांचं एकूण क्षेत्रफळ अंदाजे 1.067 हेक्टर आहे. या व्यवहाराची नोंदणी 12 मे 2026 रोजी करण्यात आली.
या व्यवहारात एकूण 5.7 लाख रुपयांचं मुद्रांक शुल्क भरण्यात आलं आहे. कागदपत्रांवरील माहितीनुसार, चार लोकांनी मिळून 0.21 हेक्टरचा एक भूखंड 20 लाख रुपयांना खरेदी केला आहे. त्याच्या जवळच असलेला 0.215 हेक्टरचा दुसरा भूखंड दोन खरेदीदारांनी अंदाजे 20 लाख रुपयांना विकत घेतला आहे.
सोनू निगमने कर्जतच्या सावेले गावातील पाच भूखंड विकले
- चार व्यक्तींच्या एका गटाने 20 लाख रुपयांना 0.21 हेक्टर जमीन खरेदी केली.
- दोन खरेदीदारांनी मिळून जवळपासची 0.215 हेक्टर जमीन सुमारे 20 लाख रुपयांना खरेदी केली.
- एका व्यक्तीने 20 लाख रुपयांना 0.225 हेक्टर जमीन खरेदी केली.
- इतर दोन व्यक्तींनी 17 लाख रुपयांना 0.20 हेक्टर जमीन खरेदी केली.
- 0.217 हेक्टरचा जमिनीचा भाग आणखी एका व्यक्तीने 18 लाख रुपयांना विकत घेतला.
काही दिवसांपूर्वीच एप्रिल महिन्यात सोनू निगमने रायगड जिल्ह्यातील कर्जत या डोंगराळ भागातील 1.9 हेक्टरपेक्षा जास्त क्षेत्रफळाचं भूखंड 1.95 कोटी रुपयांना विकलं होतं. गेल्या काही महिन्यांपासून सोनू सतत मालमत्तेशी संबंधित व्यवहारांमुळे चर्चेत आहे. यापूर्वी फेब्रुवारी 2026 मध्ये मड आयलँड इथं 1197 चौरस मीटरची जमीन दहा कोटी रुपयांना खरेदी केली होती. तर गेल्या वर्षी म्हणजेच 2025 मध्ये सोनू निगमने मुंबईतील सांताक्रूझ पूर्व इथली एक व्यावसायिक मालमत्ता पाच वर्षांसाठी 12.61 कोटींपेक्षा जास्त रुपयांनी भाडेतत्त्वावर घेतली होती.
सोनू निगम हा बॉलिवूडमधील सर्वांत लोकप्रिय गायकांपैकी एक आहे. त्याने आतापर्यंतच्या करिअरमध्ये अनेक सुपरहिट गाणी गायली आहेत. सोनू निगमला पद्मश्री, राष्ट्रीय पुरस्कार, फिल्मफेअर पुरस्कार यांनी सन्मानित करण्यात आलं आहे.
Leave a Reply