सुशांतच्या पुण्यतिथीनिमित्त बहिणीची भावनिक श्रद्धांजली, शेअर केला खास फोटो, दिला खास संदेश

Sushant Singh Rajput : 14 जून रोजी, बॉलिवूड अभिनेता सुशांत सिंह राजपूतच्या निधनाला सहा वर्षे पूर्ण झाली आहेत. 2020 मध्ये त्याच्या अकस्मात निधनाच्या बातमीने संपूर्ण देशाला हादरवून सोडले होते. त्याच्या जाण्याने चित्रपटसृष्टीसह लाखो चाहत्यांच्या मनात मोठी पोकळी निर्माण झाली होती. त्याच्या सहाव्या पुण्यतिथीनिमित्त बहीण श्वेता सिंह कीर्तीने सोशल मीडियावर एक भावनिक पोस्ट शेअर करत भावाला अनोख्या पद्धतीने श्रद्धांजली अर्पण केली आहे.

श्वेता सिंह कीर्तीने आपल्या पोस्टमध्ये दुःख व्यक्त करण्याऐवजी सुशांतच्या प्रेरणादायी जीवनाचा उत्सव साजरा करण्याचा संदेश दिला आहे. तिने लिहिले की, जेव्हा ती आपल्या भावाचा विचार करते, तेव्हा त्याच्या जाण्याची घटना नाही तर त्याने आयुष्य किती उत्साहाने आणि जिज्ञासेने जगले याची आठवण होते. तिच्या मते, सुशांतमध्ये लहान मुलासारखी निरागस उत्सुकता होती. त्याला आकाशातील तारे, ब्रह्मांडातील रहस्ये आणि मानवी मेंदूच्या कार्यप्रणालीबद्दल विशेष आकर्षण होते. सतत काहीतरी नवीन शिकण्याची आणि शोधण्याची त्याची वृत्ती अनेकांसाठी प्रेरणादायी होती.

AI तंत्रज्ञानातून साकारलेली विशेष श्रद्धांजली

या खास प्रसंगी श्वेताने सुशांतच्या काही जुन्या आठवणींना उजाळा देणारी छायाचित्रे सोशल मीडियावर शेअर केली. यामध्ये एक AI तंत्रज्ञानाच्या मदतीने तयार करण्यात आलेला फोटो विशेष चर्चेत आला आहे. या फोटोमध्ये सुशांत भगवान राम यांच्या रूपात दिसत आहे.

हा फोटो सोशल मीडियावर मोठ्या प्रमाणात व्हायरल होत असून चाहत्यांकडून त्याला मोठी पसंती मिळत आहे. श्वेताने आपल्या पोस्टमध्ये नमूद केले की, काही व्यक्ती शारीरिकरित्या आपल्यात नसल्या तरी त्यांचे विचार, त्यांची ऊर्जा आणि त्यांचा प्रभाव कायम जिवंत राहतो. सुशांत हा त्यापैकीच एक व्यक्तिमत्त्व होते.

 

View this post on Instagram

 

A post shared by Shweta Singh Kirti (@shwetasinghkirti)

चाहत्यांसाठी प्रेरणादायी संदेश

सुशांतच्या चाहत्यांना उद्देशून श्वेताने एक हृदयस्पर्शी संदेश दिला आहे. तिने म्हटले की, आयुष्यभर शिकत राहा, प्रत्येकाशी दयाळूपणे वागा, कोणत्याही भीतीशिवाय मोठी स्वप्ने पाहा आणि जगातील नकारात्मकतेमुळे आपल्या मनातील निरागसपणा कधीही हरवू देऊ नका. आयुष्य किती मोठे होते यापेक्षा आपण किती लोकांच्या आयुष्याला स्पर्श केला आणि किती जणांना प्रेरणा दिली हे अधिक महत्त्वाचे असते. या बाबतीत सुशांत आजही लाखो लोकांच्या हृदयात जिवंत आहे.

Source link