पंतप्रधान नरेंद्र मोदी सध्या स्लोव्हाकियाच्या दौऱ्यावर आहेत. आज पंतप्रधान मोदी यांनी स्लोव्हाकियाचे पंतप्रधान रॉबर्ट फिको यांच्यासोबत प्रतिनिधी स्तरावरील चर्चा केली. ही एखाद्या भारतीय पंतप्रधानांची स्लोव्हाकियाला दिलेली ही पहिलीच अधिकृत भेट ठरली आहे. ब्रातिस्लावा येथे सामंजस्य करारांवर स्वाक्षऱ्या केल्यानंतर संयुक्त पत्रकार परिषदेदरम्यान फिको यांनी पंतप्रधान मोदींचे अभिनंदन केले. फिको म्हणाले की, ‘माननीय पंतप्रधान, भारताचे सर्वाधिक काळ सेवा देणारे पंतप्रधान बनल्याबद्दल मी आपले अभिनंदन करतो. हे एका राजकीय चमत्कारासारखे आहे.’
पंतप्रधान मोदींचे केले कौतुक
स्लोव्हाकियाचे पंतप्रधान रॉबर्ट फिको यांनी पुढे बोलताना पंतप्रधान मोदी यांच्या दीर्घकाळ टिकून राहिलेल्या लोकप्रियतेचे आणि नेतृत्वाचे कौतुक करत त्यांच्या सातत्यपूर्ण कार्यकाळाचे महत्त्व अधोरेखित केले. यावर उत्तर देताना पंतप्रधान मोदी यांनी रॉबर्ट फिको यांचे आभार मानले आणि त्यांचा उल्लेख ‘अनुभवी नेता तसेच भारताचा खरा मित्र’असा केला. तसेच भारत आणि स्लोव्हाकिया यांच्यातील संबंधांना आता सर्वसमावेशक भागीदारी दर्जा देण्यात आल्याचे त्यांनी जाहीर केले.
काय म्हणाले PM मोदी?
पंतप्रधान मोदी म्हणाले की, ‘स्लोव्हाकियाची मैत्री आणि दृढ वचनबद्धता यामुळे भारत-स्लोव्हाकिया संबंधांना नव्या उंचीवर नेण्यात विशेष योगदान मिळाले आहे. आज त्यांची भेट घेण्याची आणि आपल्या संबंधांतील ऐतिहासिक क्षणाचा साक्षीदार होण्याची संधी मिळाल्याचा मला आनंद आहे. भारतीय पंतप्रधानांची स्लोव्हाकियाला झालेली ही पहिलीच भेट आहे. या ऐतिहासिक प्रसंगी आम्ही द्विपक्षीय संबंधांना सर्वसमावेशक भागीदारीच्या स्तरावर नेण्याचा निर्णय घेतला आहे. हा निर्णय परस्पर विश्वास, समान प्राधान्यक्रम आणि भविष्यासाठीच्या सामायिक दृष्टिकोनाचे प्रतीक आहे.’
#WATCH | Bratislava | Prime Minister of Slovakia, Robert Fico, says, “Mr Prime Minister, I congratulate you on being the longest serving PM in India. This is like a political miracle.” pic.twitter.com/4KRXXEW9QX
— ANI (@ANI) June 15, 2026
सांस्कृतिक संबंधांचेही कौतुक
पुढे बोलताना पंतप्रधान मोदी म्हणाले की, ‘दोन्ही देशांतील सांस्कृतिक आणि लोकांमधील संबंध हे द्विपक्षीय नात्याचा मजबूत पाया आहेत. भारतीय प्राचीन उपनिषदांचे स्लोव्हाक भाषेत झालेले भाषांतर हे आपल्या सांस्कृतिक जवळीकीचे उत्कृष्ट उदाहरण आहे. स्लोव्हाकियामध्ये राहणारे भारतीय वंशाचे नागरिक तेथील अर्थव्यवस्था आणि समाजासाठी महत्त्वपूर्ण योगदान देत आहेत.’
अवकाश आणि संरक्षण क्षेत्रात मोठी संधी
पंतप्रधान मोदी यांनी अवकाश क्षेत्रात भारत आणि स्लोव्हाकिया यांच्यात सहकार्य वाढवण्याच्या मोठ्या संधी असल्याचे नमूद केले. ‘भारताचे अवकाश क्षेत्र आज अभूतपूर्व वेगाने प्रगती करत आहे. या विकासाच्या प्रवासात सहभागी होण्यासाठी मी स्लोव्हाक कंपन्यांना आमंत्रण देतो असे म्हणत नागरी अणुऊर्जा आणि संरक्षण क्षेत्रही दोन्ही देशांसाठी महत्त्वाचे असल्याचे त्यांनी स्पष्ट केले.
Leave a Reply