तीन दिवसांपूर्वी नेपाळमध्ये आलेल्या जोरदार भूकंपानंतर मोठा जलप्रलय झाला. त्यामुळे नेपााळमध्ये 400 हून अधिक लोकांचा मृत्यू झाला आहे. तर शेकडो लोक बेपत्ता आहेत. नेपाळमधील जनजीवन आज तिसऱ्या दिवशीही विस्कळीत आहे. अनेक गावं वाहून गेले आहेत. घरे, शेती, इमारती, पूल आणि सर्वच वाहून गेलं आहे. त्यामुळे नेपाळमध्ये हाहा:कार उडालेला असतानाच आता चीनमध्येही मोठा हादरा बसला आहे. चीनमध्ये जोरदार भूकंप आल्याने सर्वच हादरून गेले आहेत. जमीनच डगमगू लागल्याने अनेकांची पळापळ झाली. भूकंपामुळे चीनचे नागरिक दहशतीखाली आहेत.
दक्षिण-पश्चिम चीनच्या सिचुआन प्रांतात आज शुक्रवारी भूकंपाचे जोरदार झटके जाणवले. चायना अर्थक्वेक नेटवर्क्स सेंटरच्या मते, लॉन्गचांग शहरात आज सकाळी 5.1 तीव्रतेच्या भूकंपाचे झटके जाणवले. विशेष म्हणजे चीनच्या शेजारील नेपाळमध्ये आधी भूकंप आणि नंतर जलप्रलय झाल्यानंतर चीनमध्येही भूकंपाचे झटके जाणवल्याने चिनी नागरिक दहशतीखाली आहेत. हिमलाय परिसर आणि त्याच्या आजूबाजूच्या भागात भूगर्भीय हालचाल होत असल्याने चीनसह नेपाळचंही टेन्शन वाढलं आहे.
नवीन तलाव फुटण्याची भीती
सिचुआनमध्ये भूकंप झाल्याच्या वृत्ताला चायना अर्थक्वेक नेटवर्क्स सेंटरनेही दुजोरा दिला आहे. भूकंपाचं केंद्र लॉन्गचांग शहरात असल्याचं सांगितलं गेलं आहे. दरम्यान, चीनच्या शेजारीच असलेल्या नेपाळमध्ये तीन दिवसांपूर्वीच भोटेकोशी नदीच्या जवळ भूस्खलन आणि मोठा जलप्रलय आल्याने मोठा हाहाकार उडाला. या जलप्रलयात आतापर्यंत 490 लोक मृत्यूमुखी पडल्याचं समोर आलं आहे. सुमारे 1500 लोक अजूनही बेपत्ता आहेत. आता त्याच परिसरात एक नवीन तलाव निर्माण झाला आहे. त्यात सातत्याने पाणी भरत आहे. तसेच हा तलावही फुटण्याची शक्यता वर्तवली जात आहे. त्यामुळे नेपाळी नागरिकांमध्ये दहशत आणि भयाचं वातावरण आहे.
नुकसान नाही, पण भय कायम
नेपाळमध्ये गुरुवारी रात्री उशिरा 3.2 तीव्रतेचा भूकंप जाणवला होता. या भूकंपात कोणतंही नुकसान झालं नाही. मात्र, भूकंप झाल्याने नागरिकांमध्ये भीती निर्माण झाली. नेपाळी नागरिकांनी भयापोटी अख्खी रात्र जागून काढली होती. आता सिचुआनमध्ये आलेल्या ताज्या भूकंपामुळे चीनी नागरिक धास्तावले आहेत. मात्र, आज आलेल्या भूकंपामुळे कोणतंही नुकसान झाल्याची नोंद नाही.
Leave a Reply