महाराष्ट्र नवनिर्माण सेनेचे अध्यक्ष राज ठाकरे यांचा 14 जून रोजी वाढदिवस होता. या वाढदिवसानिमित्त सर्वच क्षेत्रातून शुभेच्छांचा वर्षाव झाला. मराठमोळी अभिनेत्री तेजस्विनी पंडितनेही इन्स्टाग्रामवर राज ठाकरेंसोबतचे खास फोटो शेअर करत पोस्ट लिहिली आहे.
या पोस्टमध्ये तेजस्विनीने लिहिलं, 'तुमच्यासाठी राज ठाकरे हे नाव असेल फक्त, आमच्यासाठी ती भावना आहे. हे वाक्य तुमच्याविषयी तळमळ असणाऱ्यांपैकी प्रत्येकाचं आहे असं वाटतं. मी अपवाद नाही. साहेब, तुमचं महत्त्व माझ्यासाठी आणि ज्यांच्या मनात तुम्ही वसता त्यांच्यासाठी कधीच कमी होणार नाही.'
'तुम्ही महाराष्ट्रासाठी बघितलेलं स्वप्न लवकरच सत्यात उतरु दे, तुम्हाला निरोगी आयुष्य लाभू दे, कुठल्याही परिस्थितीशी दोन हात करण्याचं बळ तुम्हाला मिळूदे आणि राजकारणासारख्या रुक्ष वातावरणत स्वतःतील संवेदनशीलता जपता येऊ दे अशी तुमच्या वाढदिवसानिमित्त ईश्वराकडे प्रार्थना करते,' अशा शब्दांत तेजस्विनीने शुभेच्छा दिल्या आहेत.
या पोस्टच्या अखेरीस तेजस्विनीने राज ठाकरेंचा एक फोटो शेअर केला आहे. त्यावर लिहिलं आहे, 'समय प्रसंग ओळखावा, राग निपटुनी काढावा. आला तरी कळो न द्यावा, जनांमध्ये.' तेजस्विनीच्या या पोस्टवर अनेक मराठी कलाकारांनीही लाइक्स आणि कमेंट्सचा वर्षाव केला आहे.
'राजा माणूस' अशी कमेंट अभिनेता स्वप्निल जोशीने केली आहे. तर कुशल बद्रिके, पुष्कर जोग यांसारख्या कलाकारांनीही त्यावर प्रतिक्रिया दिल्या आहेत. तेजस्विनीने याआधीही राज ठाकरे यांच्या वाढदिवसानिमित्त आणि इतर विविध प्रसंगी अनेकदा सोशल मीडियावर विशेष पोस्ट लिहिल्या आहेत.
Leave a Reply