राजकीय वर्तुळातून मोठी बातमी समोर येत आहे. शिवसेना ठाकरे गटाचे काही खासदार हे वेगळा गट स्थापन करण्याच्या तयारीमध्ये आहेत, अशी माहिती सूत्रांकडून मिळत आहे. हे खासदार लोकसभा अध्यक्षांना पत्र देखील देणार असल्याची माहिती समोर येत आहे. रविवारीच शिवसेना ठाकरे गटाचे प्रमुख उद्धव ठाकरे यांनी सर्व खासदारांची बैठक बोलावली होती. त्यामुळे पुन्हा एकदा राज्यात ऑपरेशन टायगरची चर्चा सुरू झाली आहे. उद्धव ठाकरे यांनी बोलावलेल्या या बैठकीला शिवसेना ठाकरे गटाच्या 9 खासदारांपैकी केवळ 4 खासदारच प्रत्यक्ष उपस्थित होते. इतर 5 खासदार ऑनलाईन उपस्थित होते, असा दावा शिवसेना ठाकरे गटाचे खासदार संजय राऊत यांनी केला आहे. मात्र आता शिवसेना ठाकरे गटाचे खासदार हे वेगळा गट स्थापन करणार असल्याची माहिती समोर येत आहे. हे सर्व खासदार एकनाथ शिंदे यांच्या संपर्कात असल्याची चर्चा आहे.
दरम्यान दुसरीकडे उपमुख्यमंत्री एकनाथ शिंदे यांच्या नंदनवन बंगल्यावर देखील घडामोडींना वेग आला आहे. विधिमंडळाचे माजी प्रधान सचिव अनंत कळसे हे एकनाथ शिंदे यांची भेट घेणार आहेत. एकनाथ शिंदे यांच्या नंदनवन बंगल्यावर ही भेट होणार आहे. उद्धव ठाकरे यांचे खासदार हे वेगळा गट स्थापन करण्याची माहिती समोर येत आहे. या पार्श्वभूमीवर या भेटीला महत्त्व प्राप्त झालं आहे.
तर दुसरीकडे मात्र संजय राऊत यांनी हे वृत्त फेटाळून लावलं आहे. सर्व खासदार हे आमच्यासोबतच आहेत, असं संजय राऊत यांनी म्हटलं आहे. तर खासदार राजाभाऊ वाजे यांनी देखील या वृत्ताचं खंडण केलं आहे. कालच्या बैठकीला आम्ही चार खासदार उपस्थित होतो. इतर सर्वजन ऑनलाईन उपस्थित होते. त्यामुळे असं काहीही होणार नाहीये. दिल्लीला अनेकजण आपल्या कामासाठी जात असतात. प्रतापराव जाधव हे केंद्रीय मंत्री आहेत, त्यामुळे खासदार कामानिमित्त त्यांना भेटले असतील, असंही वाजे यांनी म्हटलं आहे. मात्र या सर्व पार्श्वभूमीवर राजकीय वर्तुळात चर्चेला चांगलंच उधाण आलं आहे.
Leave a Reply