देशातील काही बेरोजगार तरुण झुरळांसारखे आहेत. ते सोशल मीडियावर, माध्यमांमध्ये शिरकाव करतात, माहिती अधिकार कार्यकर्ते होतात आणि सर्वांवर हल्ले करू लागतात, असं वक्तव्य देशाच्या सरन्यायाधीशांनी केलं. त्यांच्या या वक्तवाला प्रतिसाद म्हणून पूर्वी ‘आप’मध्ये कार्यरत असलेल्या आणि सध्या अमेरिकेत स्थित असलेल्या अभिजीत दिपके नावाच्या तरुणाने सोशल मीडियावर प्रश्न केला की, ‘ही सारी झुरळं एकत्र आली तर?’ मग काही झुरळांनी एकत्र येऊन सोशल मीडियावर पक्ष तयार केला आणि त्याला नाव दिलं ‘कॉक्रोच जनता पार्टी’ (सीजेपी). या पक्षाने अवघ्या काही दिवसांत देशातील सर्वांत मोठ्या पक्षाच्या सोशल मीडियावरील फॉलोअर्सची संख्या पार केली. या संपूर्ण घटनेवर अभिनेते अतुल कुलकर्णी यांनी सोशल मीडियावर अत्यंत मार्मिक पोस्ट लिहिली आहे.
अतुल कुलकर्णी यांनी त्यांच्या पोस्टमध्ये थर्मोमीटरचं उदाहरण दिलं. कॉक्रोच जनता पार्टीने कशाप्रकारे एका थर्मोमीटरचं काम केलंय, हे त्यांनी पटवून दिलंय. इतकंच नव्हे तर जर थर्मोमीटर चुकतंय असं वाटत असेल, तर सेकंड, थर्ड ओपनियन घेणं हे सगळ्यात शहाणपणाचं म्हणत त्यांनी सरकारला टोला लगावला आहे.
अतुल कुलकर्णींची पोस्ट-
‘अंगाला हात लावून ताप आहे असं वाटत असतं, पण थर्मोमीटर लावलं की शरीर नक्की किती फणफणलंय ते कळतं. CJP (कॉक्रोच जनता पार्टी) नं थर्मोमीटरचं काम केलंय. थर्मोमीटरलाच डॉक्टर आणि इलाज समजणं हे ना थर्मोमीटरने स्वतः मानणं योग्य, ना थर्मोमीटरकडून तशा अपेक्षा ठेवणाऱ्यांनी. थर्मोमीटर चुकीचंच तापमान दाखवतंय असं म्हणणं वेगळं, ते अशा कंपनीनं बनवलंय ज्यांना आमचं बरं बघवत नाही असं म्हणणं वेगळं आणि ते आम्हाला हवंय ते तापमान दाखवत नाही आहे तेव्हा फोडूनच टाका म्हणणं वेगळं. थर्मोमीटर चुकतंय असं वाटत असेल तर सेकंड, थर्ड ओपिनियन घेणं हे सगळ्यात शहाणपणाचं. ताप नसेल तर उत्तमच की, असो,’ अशी पोस्ट अतुल कुलकर्णी यांनी लिहिली आहे.
आपल्या समाजात गेल्या काही वर्षांपासून असंतोष दडपला गेला होता. कॉक्रोच जनता पार्टी ही त्या असंतोषाचीच अभिव्यक्ती असल्याचं अतुल कुलकर्णी यांनी थर्मोमीटरच्या उदाहरणातून पटवून दिलं आहे. त्यांच्या या पोस्टवर नेटकऱ्यांनी विविध प्रतिक्रिया दिल्या आहेत.
Leave a Reply