दाक्षिणात्य अभिनेता विजय देवरकोंडाने नुकताच आपल्या वैयक्तिक आयुष्याबाबत मोठा खुलासा केला आहे. दिग्दर्शक संदीप रेड्डी वांगा यांचे भाऊ प्रणय वांगा यांच्या आगामी ‘रोमांचकम’ चित्रपटाच्या प्रमोशनल इव्हेंटमध्ये विजय सहभागी झाला होता. यावेळी त्याने आपल्या प्रेमसंबंधांपासून ते दारू सोडण्यापर्यंत अनेक गोष्टींवर भाष्य केले.
विजयला 2026 मधील सर्वात ‘रोमांचक’ क्षण कोणता असा प्रश्न विचारण्यात आला. यावर त्याने मिश्कील अंदाजात सांगितले की, 1989 मध्ये माझा जन्म झाला, तेव्हापासूनच माझं आयुष्य रोमांचक आहे. मी ब्लेंडर्स प्राइड किंवा ग्लेनफिडिच प्यायचो, माझ्याकडे पैसे असोत किंवा नसोत. पण आता मी दारू सोडली आहे. मात्र दारू सोडण्यामागचे कारण त्याने स्पष्ट केले नाही.
याच वेळी विजयने आपल्या जुन्या प्रेमसंबंधाबाबतही संकेत दिले. 'मला प्रेम झालं, नंतर माझं हृदय तुटलं आणि त्यानंतर माझं लग्न झालं' असे सांगत त्याने रश्मिका मंदानापूर्वी आपल्या आयुष्यात आणखी एक नातं असल्याचे सूचित केले.
दरम्यान, अभिनेत्री रश्मिका मंदानाला शूटिंगदरम्यान हिप्सला दुखापत झाली होती. तिच्या प्रकृतीबाबत अपडेट देताना विजयने सांगितले की, रश्मिका आता दुखापतीतून हळूहळू सावरत असून ठीक होत आहे आणि सध्या घरी आराम करत आहे.
लग्नानंतर विजय-रश्मिका पुन्हा एकदा मोठ्या पडद्यावर एकत्र दिसणार आहेत. त्यांचा आगामी ‘राणाबाली’ हा चित्रपट 16 ऑक्टोबर 2026 रोजी प्रदर्शित होणार असून, या चित्रपटाचे दिग्दर्शन राहुल सांकृत्यान करत आहेत.
Leave a Reply