आज 4 जुलै रोजी वाढदिवस साजरा करणाऱ्या ज्येष्ठ अभिनेत्री नीना गुप्ता यांनी आपल्या उत्कृष्ट अभिनयासोबतच वैयक्तिक आयुष्यात घेतलेल्या धाडसी निर्णयांमुळेही वेगळी ओळख निर्माण केली आहे. आज त्या लाखो महिलांसाठी प्रेरणास्थान मानल्या जातात.
कारकिर्दीच्या शिखरावर असताना नीना गुप्ता यांचे व्हिव्हियन रिचर्ड्स यांच्यासोबत प्रेमसंबंध होते. त्यातून त्या विवाह न करता गर्भवती झाल्या. त्या काळात अविवाहित महिलेने आई होणे समाजाला मान्य नव्हते. त्यामुळे त्यांना टीका, टोमणे आणि सामाजिक दबावाला सामोरे जावे लागले.
अनेकांनी त्यांना लग्न करण्याचा सल्ला दिला, तर काहींनी यामुळे त्यांचे करिअर संपुष्टात येईल, अशी भीती व्यक्त केली. आपल्या ‘सच कहूं तो’ या आत्मचरित्रात नीना गुप्ता यांनी त्या कठीण काळातील अनुभव मांडले आहेत. समाजाचा दबाव असूनही त्यांनी कोणताही खोटा किंवा तडजोडीचा निर्णय घेतला नाही.
केवळ समाजाचे तोंड बंद करण्यासाठी एका समलैंगिक व्यावसायिकाशी दिखाऊ लग्न करण्याचा सल्लाही त्यांना देण्यात आला होता. मात्र, त्यांनी हा प्रस्ताव स्पष्टपणे नाकारला.
यानंतर त्यांनी सिंगल मदर म्हणून आपल्या मुली मसाबा गुप्ता हिचे संगोपन करण्याचा धाडसी निर्णय घेतला. अभिनय क्षेत्रातील कारकीर्द आणि मुलीची जबाबदारी अशा दोन्ही आघाड्यांवर त्यांनी यशस्वीपणे काम केले. आज मसाबा गुप्ता या देशातील आघाडीच्या फॅशन डिझायनर आणि यशस्वी उद्योजिका म्हणून ओळखल्या जातात.
Leave a Reply