1985 मध्ये प्रदर्शित झालेल्या ‘राम तेरी गंगा मैली’ या चित्रपटातून रातोरात स्टार बनलेल्या अभिनेत्री मंदाकिनी पुन्हा एकदा चर्चेत आल्या आहेत. गेली जवळपास 30 वर्ष अभिनयापासून दूर असलेल्या मंदाकिनी यांनी अलीकडेच आपला संपूर्ण लूक बदलला असून त्यांचा नवीन लूक सोशल मीडियावर व्हायरल होत आहे.
62 वर्षीय मंदाकिनी यांनी नुकतेच केस कट करून नवीन हेअरस्टाईल केली असून केसांना रंगही दिला आहे. त्या मुलीसोबत सलूनमध्ये गेल्या होत्या. नवीन लूकमधील व्हिडिओ त्यांनी सोशल मीडियावर शेअर केला असून पार्श्वभूमीला त्यांच्या गाजलेल्या ‘राम तेरी गंगा मैली’ चित्रपटातील ‘सुन साहिबा सुन’ हे गाणे ऐकू येते.
मंदाकिनींचा हा नवा अंदाज पाहून चाहत्यांनी भरभरून कौतुक केले. आजही तितक्याच सुंदर दिसता, हा हेअरकट तुम्हाला खूप शोभतो, माझ्या बालपणीची आवडती अभिनेत्री अशा अनेक प्रतिक्रिया चाहत्यांनी दिल्या.
1980 च्या दशकात मंदाकिनी यांची लोकप्रियता शिखरावर होती. दिग्गज अभिनेते-दिग्दर्शक राज कपूर यांनी त्यांना ‘राम तेरी गंगा मैली’मधून चित्रपटसृष्टीत संधी दिली होती. या चित्रपटाच्या यशानंतर त्या बॉलिवूडमधील आघाडीच्या अभिनेत्रींपैकी एक बनल्या.
आज त्या अभिनय क्षेत्रापासून दूर असल्या तरी सोशल मीडियावर सक्रिय आहेत. मंदाकिनी यांचा नवा लूक सध्या चाहत्यांमध्ये चर्चेचा विषय ठरत आहे. त्यांच्या सौंदर्याचे आणि आत्मविश्वासाचे अनेकांनी कौतुक केले आहे.
Leave a Reply