पंतप्रधान नरेंद्र मोदी हे काही दिवसांनी ऑस्ट्रेलिया दौऱ्यावर जाणार आहेत, अशातच आता त्यांच्या ऑस्ट्रेलिया दौऱ्यापूर्वी त्यांना सोशल मीडियावर जीवे मारण्याची धमकी मिळाल्याची माहिती समोर आली आहे. वृत्तानुसार, मेलबर्न येथे होणाऱ्या “मेलबर्न मीट्स मोदी” कार्यक्रमाशी संबंधित एका फेसबुक पोस्टवरील कमेंटद्वारे ही धमकी देण्यात आली. या प्रकरणाची गंभीर दखल घेत ऑस्ट्रेलियातील सुरक्षा यंत्रणांनी तपास सुरू केला आहे. याबाबत सविस्तर माहिती जाणून घेऊयात.
पंतप्रधान मोदींना जीवे मारण्याची धमकी
पंतप्रधान नरेंद्र मोदी 8 ते 10 जुलैदरम्यान ऑस्ट्रेलियाच्या मेलबर्न दौऱ्यावर जाणार असून, या काळात ते भारत-ऑस्ट्रेलिया वार्षिक शिखर परिषदेत सहभागी होणार आहेत. मात्र या दौऱ्यापूर्वी त्यांना जीवे मारण्याची धमकी देण्यात आली आहे, मेलबर्नच्या मार्व्हल स्टेडियममध्ये 9 जुलै रोजी होणाऱ्या मेलबर्न मीट्स मोदी कार्यक्रमाच्या प्रचारासाठी करण्यात आलेल्या फेसबुक पोस्टच्या कमेंट सेक्शनमध्ये ही कथित धमकी देण्यात आली आहे. अबू मुस्तफा नावाच्या फेसबुक अकाउंटवरून, “स्टेडियमचे छत बंद ठेवावे, अन्यथा मोदी ऑस्ट्रेलियात त्यांच्या मृत्यूसाठी येत आहेत,” अशी धमकीची कमेंट करण्यात आली होती. ही पोस्ट समोर आल्यानंतर सुरक्षा यंत्रणा तात्काळ सतर्क झाल्या असून तपास सुरू करण्यात आला आहे. मात्र, अद्याप कोणालाही अटक करण्यात आलेली नाही.
ऑस्ट्रेलियन यंत्रणांकडून तपास
ऑस्ट्रेलियन तपास अधिकाऱ्यांनी फेसबुक अकाउंटशी जोडलेल्या IP अॅड्रेसची ओळख पटवली असून, या प्रकरणाचा तपास सुरू आहे. ऑस्ट्रेलियन फेडरल पोलिसांनी अद्याप कोणालाही अटक केलेली नाही, तसेच तपासाबाबत अधिक माहिती देण्यासही त्यांनी नकार दिला आहे. मात्र, सुरक्षा यंत्रणा या कथित धमकीची अत्यंत गांभीर्याने चौकशी करत आहेत अशी माहिती समोर आली आहे.
मोदी 8 ते 10 जुलैदरम्यान ऑस्ट्रेलिया दौऱ्यावर
पंतप्रधान नरेंद्र मोदी 8 ते 10 जुलैदरम्यान ऑस्ट्रेलिया दौऱ्यावर असणार आहेत. या दौऱ्यात ते मेलबर्न येथे आयोजित भारत-ऑस्ट्रेलिया वार्षिक लीडर्स समिटमध्ये सहभागी होतील. तसेच ऑस्ट्रेलियाचे पंतप्रधान अँथनी अल्बनीज यांच्यासोबत द्विपक्षीय चर्चा करणार आहेत. त्याचबरोबर मोदी मेलबर्न मीट्स मोदी या कार्यक्रमात ऑस्ट्रेलियात राहणाऱ्या भारतीय समुदायालाही संबोधित करणार आहेत.
Leave a Reply