राज्याच्या राजकारणात गेल्या काही काळापासून मोठ्या घडामोडी घडलेल्या आहेत. काही महिन्यांपूर्वी झालेल्या स्थानिक स्वराज्य संस्थांच्या निवडणुकीत मोठ्या प्रमाणावर पक्षांतर पहायला मिळाले होते. त्यानंतर शिवसेना उद्धव बाळासाहेब ठाकरे पक्षाच्या 6 खासदारांनी एकनाथ शिंदे यांच्या शिवसेनेत प्रवेश केला होता. त्यामुळे राजकारणात खळबळ उडाली होती. आता पुन्हा एकदा राज्याचे राजकारण ढवळून निघण्याची शक्यता आहे. कारण काँग्रेसमधून बाहेर पडलेल्या एका बड्या नेत्यांने एकनाथ शिंदे यांची भेट घेतली आहे. हा नेता कोण आहे? त्याने शिंदेंची भेट का घेतली याबाबत सविस्तर माहिती जाणून घेऊयात.
बडा नेता एकनाथ शिंदेंच्या भेटीला
अकोल्याच्या राजकारणात पुन्हा एकदा मोठी राजकीय खळबळ उडण्याची शक्यता. काँग्रेसचे माजी लोकसभा उमेदवार डॉ.अभय काशिनाथ पाटील यांनी उपमुख्यमंत्री एकनाथ शिंदे यांची भेट घेतली आहे. विशेष म्हणजे या भेटीत तब्बल तासभर चर्चा झाल्याची माहिती समोर आली आहे. या बैठकीला एकनाथ शिंदे आणि खासदार श्रीकांत शिंदे यांचे निकटवर्तीय ॲड. निलेश देशमुख हे देखील उपस्थित होते. ही भेट नेमकी राजकीय होती की खासगी, याची अधिकृत माहिती अद्याप समोर आलेली नाही. मात्र डॉक्टर अभय पाटील यांच्या या भेटीना राजकीय वर्तुळात चर्चांना उधाण आले आहे.
काँग्रेसकडून लढवली होती लोकसभा निवडणूक
डॉ. अभय पाटील यांनी 2024 ची अकोला लोकसभा निवडणूक काँग्रेसच्या तिकिटावर लढवली होती. त्यांनी 4 लाख 16 हजार 404 मतं घेत भाजपचे अनुप धोत्रे यांना जोरदार टक्कर दिली होती. मात्र अनुप धोत्रे यांनी 4 लाख 57 हजार 30 मतं मिळवत 20 हजार 626 मतांनी विजय मिळवला होता. त्यावेळी वंचितचे प्रकाश आंबेडकर तिसऱ्या क्रमांकावर राहिले होते.
वर्षभरापूर्वी काँग्रेसला रामराम
व्यवसायाने डॉक्टर असलेले डॉ. अभय पाटील हे महाराष्ट्र प्रदेश काँग्रेस कमिटीचे सरचिटणीस राहिले असून मराठा क्रांती मोर्चाचे प्रादेशिक समन्वयक म्हणूनही त्यांनी काम केल आहे. मात्र, जुलै 2025 मध्ये त्यांनी काँग्रेसच्या सदस्यत्वाचा राजीनामा दिला होता. आता एकनाथ शिंदे यांच्यासोबत आज झालेल्या या भेटीमुळे डॉ. अभय पाटील यांच्या पुढील राजकीय भूमिकेकडे अकोल्यासह संपूर्ण विदर्भाचं लक्ष लागलं आहे.
Leave a Reply