सावित्रीबाई फुले पुणे विद्यापीठाशी संबंधित बनावट पदवी प्रमाणपत्र (डिग्री सर्टिफिकेट) प्रकरण उघडकीस आल्यानंतर शिक्षण क्षेत्रात खळबळ उडाली आहे. या प्रकरणात विद्यार्थ्याच्या वडिलांनी विद्यापीठातील एका अधिकाऱ्याला 70 हजार रुपये दिल्याचा आरोप समोर आला असून, संपूर्ण प्रकरणाची चौकशी सुरू करण्यात आली आहे.
मिळालेल्या माहितीनुसार, संबंधित विद्यार्थ्याच्या वडिलांनी वाडिया महाविद्यालयाचे पदवी प्रमाणपत्र मिळवून देण्याच्या नावाखाली विद्यापीठातील अधिकाऱ्याला 70 हजार रुपये दिल्याचा दावा केला आहे. या व्यवहारानंतर प्रमाणपत्राच्या वैधतेबाबत संशय निर्माण झाल्याने प्रकरण समोर आले.
या प्रकरणाची तक्रार प्राप्त झाल्यानंतर सावित्रीबाई फुले पुणे विद्यापीठ प्रशासनाने तातडीने दखल घेत सत्यशोधन समितीची स्थापना केली आहे. समिती संपूर्ण प्रकरणाची सखोल चौकशी करून संबंधित कागदपत्रांची पडताळणी करणार असून, त्यानंतर सविस्तर अहवाल विद्यापीठ प्रशासनाकडे सादर केला जाणार आहे.
विद्यापीठाचे प्रभारी कुलगुरूंनी या प्रकरणाची गंभीर दखल घेतली असून, चौकशी अहवालाच्या आधारे आवश्यक ती पुढील कारवाई करण्यात येईल, अशी माहिती दिली आहे. या कथित बनावट पदवी प्रमाणपत्र प्रकरणामुळे विद्यापीठाच्या परीक्षा व प्रमाणपत्र वितरण प्रक्रियेवरही प्रश्नचिन्ह उपस्थित झाले असून, चौकशी अहवालाकडे विद्यार्थी आणि पालकांचे लक्ष लागले आहे.
Leave a Reply