मुंबईतील घाटकोपर येथे किरण लांडगे मित्र परिवाराने आयोजित केलेल्या दहीहंडी उत्सवाला यंदा शिक्षक दिनाचा योग साधून एक वेगळा आयाम मिळाला. दरवर्षीप्रमाणे यंदाही मोठ्या उत्साहात हा दहीहंडी सोहळा साजरा करण्यात आला असून, विशेष म्हणजे यंदा शिक्षकांना सलामी देत त्यांचा विशेष सन्मान करण्यात आला.
शिक्षक दिनाचे औचित्य साधून आयोजकांनी हा निर्णय घेतला. या दहीहंडी उत्सवाला मराठी चित्रपटसृष्टीतील प्रसिद्ध अभिनेते अजिंक्य देव यांनी खास उपस्थिती लावली. त्यांनी किरण लांडगे यांच्या कार्याचे कौतुक करत, हा उत्सव समाजातील प्रत्येक घटकाचा सन्मान करणारा असल्याचे म्हटले. मुंबईतील विविध भागांतून आलेल्या गोविंदा पथकांनी मोठ्या उत्साहात मानवी मनोरे रचत दहीहंडी फोडली.
सुमारे १०० हून अधिक गोविंदा पथकांनी या सोहळ्यात सहभाग घेतल्याचे आयोजकांनी सांगितले. यापूर्वी या दहीहंडीत पोलीस कर्मचारी आणि स्वच्छता कर्मचाऱ्यांचाही सन्मान करण्यात आला होता. समाजातल्या प्रत्येक घटकाला सन्मानित करणारी ही मुंबई उपनगरातील सर्वात मोठी दहीहंडी असल्याचे आयोजकांचे म्हणणे आहे. या भव्य उत्सवात प्रसिद्ध नृत्यांगना राधा पाटील यांच्या नृत्याचा कार्यक्रमही आयोजित करण्यात आला आहे, ज्यामुळे उत्साहात भर पडली आहे.
Leave a Reply