अभिनेता भूषण प्रधानने इन्स्टाग्रामवर फोटो शेअर करत त्याच्या कॅप्शनमध्ये एक तारीख लिहिली होती. ही तारीख होती 24 जुलै 2026. या फोटोमध्ये भूषणने एका तरुणीसोबत रोमँटिक पोझ दिली होती. त्यावरून त्याने साखरपुडा केला असून 24 जुलै रोजी लग्न करणार असल्याच्या चर्चांना उधाण आलं होतं.
भूषणने पोस्ट केलेल्या फोटोमध्ये दोघांच्या हातात अंगठी दिसत असल्याने त्याने गुपचूप साखरपुडा उरकला की काय, असा प्रश्न चाहत्यांना पडला. त्यानंतर सर्वांनी त्याच्यावर शुभेच्छांचा वर्षाव करण्यास सुरुवात केली. या फोटोमागचं सत्य अखेर त्याने चाहत्यांना सांगितलं आहे.
'तुमच्यापैकी अनेकांनी मला अगदी मनापासून, आपुलकीने शुभेच्छा दिल्या.. त्या मी मनात जपून ठेवणार आहे. आणि खरं सांगायचं तर, तुम्ही ज्या आनंदाने आणि उत्साहाने प्रतिक्रिया दिल्यात.. तसाच आनंद आणि प्रतिक्रिया मी अनेक वर्षांपासून माझ्या एखाद्या चित्रपटासाठी अनुभवायची वाट पाहत होतो', असं त्याने लिहिलंय.
'कदाचित मी तुम्हाला थोडंसं वैयक्तिक अशा भावनेत सामील केलं असेल. पण हा चित्रपट माझ्यासाठी तितकाच जवळचा आहे. स्वप्नसुंदरी', असं भूषणने स्पष्ट केलं. अभिनेत्री सायली पाटीलसोबतचा त्याचा हा चित्रपट येत्या 24 जुलै रोजी प्रदर्शित होणार आहे.
त्यामुळे भूषणने खरंच साखरपुडा केला नसून त्याच्या आगामी चित्रपटाच्या प्रमोशननिमित्त त्याने तशी पोस्ट केली होती. हे स्पष्ट झाल्यानंतर नेटकऱ्यांनी विविध प्रतिक्रिया दिल्या आहेत. 'वाटलंच होतं', असं एकाने लिहिलंय. तर 'हे योग्य नाही', असं म्हणत दुसऱ्या युजरने हसण्याचा इमोजी पोस्ट केला आहे.
Leave a Reply