स्टार प्रवाह वाहिनीवर लवकरच 'मराठी मीडियम' ही नवी मालिका प्रेक्षकांच्या भेटीला येणार आहे. या मालिकेची घोषणा होताच चर्चा रंगली ती मालिकेच्या मुख्य नायिकेची. सुप्रसिद्ध सोशल मीडिया इन्फ्लुएन्सर, टिकटॉक स्टार श्रद्धा पवार या मालिकेत मुख्य नायिकेच्या भूमिकेत झळकणार आहे.
श्रद्धाचा हा प्रवास अतिशय प्रेरणादायी आणि संघर्षमय राहिला आहे. लहानपणापासूनच अभिनयाची आवड असलेल्या श्रद्धाने शालेय जीवनात विविध एकांकिका आणि नाट्यस्पर्धांमधून आपल्या अभिनयाची छाप पाडली. त्याचबरोबर सोशल मीडियाच्या माध्यमातून तिने आपली कला प्रेक्षकांपर्यंत पोहोचवण्यास सुरुवात केली. तिच्या अभिनयाला आणि व्यक्तिमत्त्वाला प्रेक्षकांचा मोठा प्रतिसाद मिळत गेला.
गेल्या चार वर्षांत श्रद्धाने अनेक मालिकांमधून छोट्या-मोठ्या भूमिका साकारत अभिनय क्षेत्रात स्वतःची ओळख निर्माण केली. मुख्य अभिनेत्री बनण्याचं स्वप्न मनात बाळगून ती सातत्याने मेहनत घेत राहिली. अखेर अडीच वर्षांच्या अथक प्रयत्नांनंतर तिला मराठी मिडियम मालिकेच्या ऑडिशनसाठी संधी मिळाली.
चार टप्प्यांच्या ऑडिशन प्रक्रियेनंतर श्रद्धाची या भूमिकेसाठी निवड झाली आणि खऱ्या अर्थाने मेहनतीचं फळ तिला मिळालं. मराठी मिडियम मालिकेत श्रद्धा सरस्वती खेडेकर ही व्यक्तिरेखा साकारणार आहे. मराठी शाळेच्या अस्तित्वासाठी झटणारी, आपल्या संस्कृतीचा आणि मातृभाषेचा अभिमान बाळगणारी सरस्वती ही भूमिका श्रद्धासाठी एक मोठं आव्हान आणि तितकीच महत्त्वाची संधी ठरणार आहे.
एक स्वप्न होतं माझं, जे आज पूर्ण झालं. मला लहानपणापासूनच अभिनयाची आवड होती. 2020 मध्ये टिकटॉक सुरू केलं, फेमस झाले. मग गाण्यात अभिनय केला. 2022 पासून मालिकेत काम सुरू केलं. आधी छोट्या भूमिका केल्या आणि ही माझी पहिलीच मालिका आहे, ज्यात मी मुख्य भूमिका साकारणार आहे, अशा शब्दांत श्रद्धाने आनंद व्यक्त केला.
Leave a Reply