भारताच्या चित्रपटसृष्टीत 2023 मध्ये प्रदर्शित झालेला The Lady Killer हा चित्रपट आज सर्वात मोठा फ्लॉप चित्रपट म्हणून ओळखला जातो. मोठे बजेट, प्रसिद्ध कलाकार आणि मोठे प्रोड्युसर्स असूनही हा चित्रपट बॉक्स ऑफिसवर अक्षरशः फ्लॉप ठरला.
सुमारे 45 कोटी रुपयांच्या बजेटमध्ये बनलेल्या या चित्रपटाने पहिल्याच दिवशी संपूर्ण भारतात केवळ सुमारे 38 हजार रुपयांची कमाई केली. पुढे त्याचा एकूण लाइफटाइम कलेक्शन फक्त 60 हजार ते 1 लाख रुपयांच्या दरम्यानच राहिले. इतकी मोठी स्टारकास्ट असलेल्या चित्रपटासाठी ही आकडेवारी अत्यंत धक्कादायक मानली जाते. अनेक थिएटर्समध्ये एकही तिकीट विकले गेले नाही, त्यामुळे काही ठिकाणी शो रद्द करावे लागले.
चित्रपट का ठरला फ्लॉप?
या चित्रपटात अजुन कपूर आणि भूमी पेडणेकर मुख्य भूमिकेत होते. दिग्दर्शक अजय बहल यांनी हा सस्पेन्स थ्रिलर चित्रपट दिग्दर्शित केला होता. कथेनुसार, एक सामान्य माणूस एका गूढ स्त्रीच्या प्रेमात पडतो आणि त्यानंतर अनेक रहस्ये उलगडत जातात. कागदावर ही कथा रंजक वाटत असली, तरी प्रत्यक्ष पडद्यावर ती प्रभावीपणे साकारली गेली नाही.
या चित्रपटाच्या अपयशामागचे सर्वात मोठे कारण म्हणजे तो पूर्णपणे शूटच करण्यात आलेला नव्हता. काही मीडिया रिपोर्ट्सनुसार, बजेटची कमतरता किंवा अंतर्गत वादांमुळे अनेक महत्त्वाचे सीन शूट होऊ शकले नाहीत. मेकर्सनी ही कमतरता भरून काढण्यासाठी वॉयसओव्हर आणि एडिटिंगचा वापर केला, पण प्रेक्षकांनी ही त्रुटी लगेच ओळखली आणि चित्रपट नाकारला.
साधारणपणे मोठ्या चित्रपटांना रिलीजपूर्वी मोठ्या प्रमाणावर प्रमोशन केले जाते. मात्र, या चित्रपटाच्या बाबतीत तसे काहीच झाले नाही. ट्रेलर रिलीज झाल्यानंतर काही दिवसांतच चित्रपट थिएटरमध्ये आला. कोणतेही इंटरव्ह्यू, सोशल मीडिया कॅम्पेन किंवा जाहिरात नव्हती. यामुळे असे वाटले की मेकर्स स्वतःच हा चित्रपट शांतपणे रिलीज करून पुढे जायचे ठरवत होते.
शेवटी यूट्यूबवर फ्री रिलीज
असेही सांगितले जाते की, OTT प्लॅटफॉर्मसोबतच्या करारामुळे हा चित्रपट थिएटरमध्ये रिलीज करणे आवश्यक होते. त्यामुळे अपूर्ण अवस्थेतच तो मोठ्या पडद्यावर आणला गेला. परंतु थिएटरमध्ये फ्लॉप ठरल्यानंतर कोणत्याही मोठ्या OTT प्लॅटफॉर्मने तो विकत घेण्यास रस दाखवला नाही.
मोठा तोटा झाल्यानंतर आणि प्रेक्षकांपर्यंत चित्रपट पोहोचवण्यासाठी, मेकर्सनी थिएटर रिलीजच्या सुमारे 10 महिन्यांनंतर हा चित्रपट यूट्यूबवर मोफत उपलब्ध करून दिला. कोट्यवधी रुपये खर्च करून बनवलेला चित्रपट शेवटी फ्रीमध्ये रिलीज करावा लागणे, ही बॉलिवूडसाठी अत्यंत दुर्मिळ आणि धक्कादायक घटना मानली जाते.
Leave a Reply