हरियाणाच्या फरीदाबादमध्ये 28 वर्षीय व्यावसायिक राहुलने दुकानातच गळफास घेऊन आत्महत्या केल्याची धक्कादायक घटना उघडकीस आली आहे. आत्महत्येआधी राहुलने सोशल मीडियावर व्हिडिओ पोस्ट केला. या व्हिडिओमध्ये बायको, सासरच्या मंडळीवर मानसिक छळ केल्याचा आरोप केला आहे. राहुलचा सोशल मीडियावरील व्हिडिओ समोर आल्यानंतर पोलिसांनी तपास सुरू केला आहे. राहुलने व्हिडिओतून सासरच्या मंडळीवर केलेल्या आरोपाच्या अंगानेही पोलिसांनी तपास सुरू केला आहे.
पोलिसांनी दिलेल्या माहितीनुसार, राहुलने रविवारी घरी आईची भेट घेतली. त्यानंतर त्याच्या दुकानाकडे निघाला. परंतु काही वेळानंतर राहुलने दुकानात आत्महत्या केल्याची माहिती कुटुंबाला समजली. या घटनेची माहिती मिळताच पोलिसांनी तातडीने घटनास्थळी धाव घेतली. त्यानंतर पोलिसांनी राहुलचा मृतदेह ताब्यात घेऊन पोस्टमार्टमसाठी रुग्णालयात पाठवला.
आत्महत्या करण्याआधी काढलेल्या व्हिडिओमध्ये राहुलने सासरच्या मंडळीवर आरोप केले. त्याने पत्नी ज्योती, सासू वीना, सासरा बिट्टू, मेव्हणी नीतू यांच्यावर मानसिक छळ केल्याचा आरोप केला. त्याने म्हटलं की, घरात झाडू मारणे, भांडे घासणे करायचो. त्यानंतरही मारहाण केली जायची. त्याच्याविरोधात खोटे गुन्हे दाखल केल्याचाही आरोप त्याने केला. यामुळे राहुल मानसिक तणावात होता.
व्हिडिओमध्ये राहुलने म्हटलं की, त्याच्या आत्महत्येसाठी बायको आणि सासरची मंडळी जबाबदार आहे. त्यांच्याविरोधात कठोर कारवाई केली पाहिजे. माझ्या मृत्यूनंतर माझी संपत्ती आई, बहीण आणि भावांना देण्यात यावी, अशी अंतिम इच्छा देखील राहुलने बोलून दाखवली. राहुलच्या नातेवाईकांच्या आरोपानुसार, राहुलचा 2 वर्षांपूर्वी प्रेमविवाह झाला. लग्नानंतर आई-वडिलांपासून वेगळं राहण्यासाठी बायकोने हट्ट केला. त्यामुळे राहुल वेगळा राहू लागला. त्याने 4 महिन्याआधी कपड्याचं नवीन दुकान सुरू केलं होतं.
अनेक दिवसांपासून राहुल मानसिक तणावात
राहुलचा नातेवाईक अमित यांनी आरोप करताना म्हटलं की, बायको आणि सासरच्या मंडळीच्या त्रासामुळे राहुल गेल्या अनेक महिन्यांपासून मानिसक तणावात होता. त्याच्या पत्नीने त्याच्या विरोधात पोलिसांत गुन्हा देखील दाखल केला होता. पोलिसांत गुन्हा दाखल झाल्याने राहुल अधिकच मानसिक तणावात गेला होता.
Leave a Reply