केंद्रीय निवडणूक आयोगाने 4 राज्यांतील 5 विधानसभा आणि एका लोकसभा मतदारसंघाच्या पोटनिवडणुकीची घोषणा केली आहे. आसाममधील नागांव लोकसभा मतदारसंघासह पश्चिम बंगालमधील रेझीनगर आणि नंदीग्राम, तामिळनाडूमधील मदुरंथकम आणि धारापुरम तसेच पुद्दुचेरीतील थट्टानचावडी विधानसभा मतदारसंघाचे वेळापत्रक जाहीर करण्यात आले आहे. या ठिकाणी 6 ऑक्टोबर रोजी मतदान होणार आहे. तर 9 ऑक्टोबर रोजी निकाल जाहीर केले जाणार आहेत.
पश्चिम बंगालमधील नंदीग्राम मतदारसंघ हा मुख्यमंत्री सुवेंदू अधिकारी यांचा बालेकिल्ला मानला जातो. 2021 च्या विधानसभा निवडणुकीत तत्कालीन मुख्यमंत्री ममता बॅनर्जी यांना सुवेंदू अधिकारी यांच्या हातून पराभव स्वीकारावा लागला होता. यंदाच्या विधानसभा निवडणुकीत सुवेंदू अधिकारी यांनी भवानीपूर आणि नंदीग्राम अशा दोन मतदारसंघांतून निवडणूक लढवली आणि दोन्ही ठिकाणी विजय मिळवला. भवानीपूरमध्ये त्यांनी ममता बॅनर्जी यांचा पराभव केला. या निवडणुकीत ममता बॅनर्जी यांच्या तृणमूल काँग्रेसलाही मोठ्या पराभवाचा सामना करावा लागला होता.
ममता बॅनर्जी पुन्हा मैदानात उतरणार?
मोठा विजय मिळवल्यानंतर सुवेंदू अधिकारी यांनी आपला पारंपरिक नंदीग्राम मतदारसंघ सोडला. त्यामुळे आता ममता बॅनर्जी पुन्हा नंदीग्राममधून निवडणूक लढवणार का, असा प्रश्न उपस्थित होत आहे. त्या पुन्हा मैदानात उतरून पक्षाच्या कार्यकर्त्यांमध्ये नवचैतन्य निर्माण करणार का, याकडे सर्वांचे लक्ष लागले आहे.
नागांव लोकसभा मतदारसंघातही पोटनिवडणूक
पोटनिवडणूक जाहीर झालेल्या सहा जागांपैकी एक लोकसभा मतदारसंघ आहे. आसाममधील नागांव लोकसभा मतदारसंघाचे खासदार प्रद्युत बोरदोलोई यांनी विधानसभा निवडणुकीपूर्वी खासदारकीचा राजीनामा दिला होता. त्यानंतर त्यांनी काँग्रेस सोडून भाजपमध्ये प्रवेश केला. त्यामुळे नागांव लोकसभा मतदारसंघातही आता पोटनिवडणूक होणार आहे.
रेझीनगरमध्येही पोटनिवडणूक
पाच विधानसभा मतदारसंघांमध्ये पश्चिम बंगालमधील रेझीनगर आणि नंदीग्राम या दोन जागांचा समावेश आहे. रेझीनगरमधून आम जनता उन्नयन पार्टी (AJUP) चे प्रमुख हुमायूं कबीर विजयी झाले होते. त्यांना नौदा मतदारसंघातूनही विजय मिळाला होता. त्यानंतर त्यांनी रेझीनगर विधानसभा मतदारसंघाचा राजीनामा दिला. त्यामुळे या जागेवरही पोटनिवडणूक होत आहे. विधानसभा निवडणुकीपूर्वी हुमायूं कबीर यांची तृणमूल काँग्रेसमधून हकालपट्टी करण्यात आली होती.
दरम्यान, तामिळनाडूमधील मदुरंथकम आणि धारापुरम या दोन विधानसभा मतदारसंघांमध्येही पोटनिवडणूक होणार आहे. याशिवाय पुद्दुचेरीतील थट्टानचावडी विधानसभा मतदारसंघासाठीही निवडणूक आयोगाने पोटनिवडणुकीची घोषणा केली आहे.
Leave a Reply