फुटबॉलचा स्टार खेळाडू असलेल्या पोर्तुगालच्या ख्रिस्तियानो रोनाल्डोच्या आंतरराष्ट्रीय करिअरबाबत एक मोठी बातमी समोर आली आहे. रोनाल्डोची बहीण कटिया एविरोने त्याच्या निवृत्तीबाबत मोठा खुलासा केला आहे. फिफा वर्ल्डकप 2026 स्पर्धेनंतर पोर्तुगाल राष्ट्रीय संघासोबत ख्रिस्तियानो रोनाल्डोचा ही शेवटची स्पर्धा असणार आहे. त्यानंतर आंतरराष्ट्रीय फुटबॉल करिअरमधून निवृत्ती घेईल. ख्रिस्तियानो रोनाल्डोच्या निवृत्तीबाबत बहिणीने दिलेल्या माहितीनंतर क्रीडाविश्वात खळबळ उडाली आहे. फिफा वर्ल्डकप 2026 स्पर्धेत पोर्तुगालने राउंड ऑफ 16 मध्ये एन्ट्री मारली आहे. या फेरीत पोर्तुगालचा सामना स्पेनशी होणार आहे. या दरम्यान रोनाल्डोबाबत आलेल्या बातमीने चाहत्यांना धक्का बसला आहे. त्याच्या कारकिर्दीत त्याला एकही फुटबॉल वर्ल्डकप जिंकता आलेला नाही. जर हा वर्ल्डकप शेवटचा असेल तर पोर्तुगालने जिंकावा अशी इच्छा त्याच्या चाहत्यांची आहे.
काय म्हणाली ख्रिस्तियानोची बहीण?
फिफा वर्ल्डकप स्पर्धेत ख्रिस्तियानो रोनाल्डो सहाव्यांदा भाग घेतला आहे. 41 वर्षीय ख्रिस्तियानो रोनाल्डो अल नासर फुटबॉल क्लबकडून खेळतो. या स्पर्धेनंतर क्लब फुटबॉल खेळेल पण आंतरराष्ट्रीय फुटबॉल करिअरला रामराम ठोकणार, याची कल्पना चाहत्यांना होती. पण बहीण कटियाने स्पोर्ट्स वृत्तवाहिन्यांशी चर्चा करताना या खुलासा केल्याने त्यावर शिक्कामोर्तब झालं आहे. कटियाने सांगितलं की, ‘जिथपर्यंत हा प्रवास सुरू आहे तिथपर्यंत याचा पूर्ण आनंद घे. हा प्रवास खूप लवकर संपणार आहे. खूप जवळच्या आणि विश्वसनीय सूत्रांकडून ही माहिती मिळाली आहे. त्यांच्या मते रोनाल्डोचा हा ‘लास्ट डान्स’ आहे.’ फिफा वर्ल्डकप 2026 स्पर्धेत ख्रिस्तियानो रोनाल्डोने आतापर्यंत 3 गोल केले आहेत. साखळी फेरीत उझबेकिस्तानविरुद्ध 2 गोल केले. तर राउंड ऑफ 32 मध्ये क्रोएशियाविरुद्ध एक गोल मारला.
2030 फिफा वर्ल्डकप चर्चेला पूर्णविराम
पोर्तुगालचे मुख्य प्रशिक्षक रॉबर्टो मार्टिनेज यांनी एका पत्रकार परिषदेत मोठं विधान करत सांगितलं होतं की, रोनाल्डोचं फिटनेस पाहता तो 2030 फिफा वर्ल्डकप स्पर्धेत खेळू शकतो. पण पोर्तुगाल फुटबॉल महासंघाचे हेड पेड्रो प्रोएनका यांनी प्रशिक्षकांच्या या वक्तव्याशी असहमती दर्शवली होती. प्रोएनका यांच्या मते, रोनाल्डोचं 2030 वर्ल्डकप स्पर्धेत खेळणं आश्चर्यकारक असेल आणि त्याची शक्यता खूपच कमी आहे.
Leave a Reply